رد: ناوي اشتري فيرنا 2005 .. شوية استفسارات الله يكرمكم ياريت تفيدوووني
انتا متأكد انها خليجى الاول ؟؟
خلى بالك لأن الفيرنا لو خليجى هيكون اسمها اكسنت مش فيرنا ...
التقفيل المصرى بس هيا اللى اسمها فيرنا ...
بالنسبة للكشف على العربية هتروح ترفعها وتطمن على الشاسية والعفشة وبعدين توديها لسمكرى يكشف على الصاج وان كان فيه بارومة وبعدين توديها لميكانيكى كويس يكشف على الموتور والفتيس ...
طبعا قبل كل ده لازم تسوقها مده كافيه ولو عندك اى ملاحظات او حسيت بشئ غريب قول للصنايعية عليه سواء فى الميكلنيكا او العفشة .......
بالنسبة للى قالك ان الانجيكشن وحش يبقى - مع احترامى الشديد ليه ولوجهة نظرة - مش بيفهم فى العربيات خالص ...
معظم العربيات الحديثة و الزيرو كلها انجيكشن .. والكربيراتير ده خلاص اختراع قديم ولم يعد يستخدم خالص فى الموديلات الجديدة .....
واصلا الانجيكشن مشاكلة قليلة جدا عن الكربيراتير ويوم ما بيبوظ بيبقى شيل وحط ومش بيحتاج ظبط زى الكربيراتير لان كله الكترونى (الانجيكشن اسمه بالعربى حقن الكترونى للوقود)
ده غير التوفير فى البنزين واداء الموتور الممتاز ....
عاوز كمان اقولك ان الكربيراتير رخم جدا فى صيانتة وغير دقيق .. ناهيكم عن مشاكله الكتير زى خنقة العربية والدخنة السودا ...
كل العربيات الجديدة انجيكشن طبعا باستثناء مثلا الادا الجديدة (المصرى بس) والشاهين (بردو مش كلها) و (الماروتى) .. يعنى العربيات اللى تصميمها قديم ولسه بتنزل زيرو .....
وبما انك لسه "خام" يبقى يشرفنى انا وجميع اعضاء مصر موتورز ان نجحيب على اى استفسار يخطر على بالك فى مجال العربيات ...
ما عليك بس سوى عمل موضوع جديد وقراءة الردود ....
ونورت بيتك التانى "مصر موتورز ..
__________________
رحـــمـــــــــــة الله عـــلــــــيـــــــك يا حــبـيـبـنــــــــا
ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــ
|