المشاركة الأصلية كتبت بواسطة dont ask me
يا جماعه انا عايز اعرف سبب حبكم لل 128 ومش عارف بتحبوها ليه ولا شكلها حلو ولاتقنياتها متطوره وصوت متورها عالى وليه بتكرهو لادا اوى مع انها ارحم من 128 على الاقل بتستحمل اوى وشكلها تقريبا قريب منها اوى ارجو الافاده
|
شوف يا باشا فيه مثل بيقول"مال بناتك بايرة قال أمهم مش دايرة"
واللادا أمها مش دايرة أمها نايمة على ودانها
يعني لو شركة لادا بتهتهم بخدمة ما بعد البيع وبتوفر لك قطع غيار رخيصة مكانش حد في مصر ركب أي عربية إلا لادا
أنا لما جيت أشري عربية كنت مستحيل وقتها أشتري 128 إشتريت لادا أوكا رائعة كفكرة يعني لو رجع بي الزمن لسنة 2000 وقت نزولها مصر ومعي ضعف ثمنها كنت هأشتريها جديدة زيرو مش حاجة تانية
لكن تعالى شوف لما بتعطل بأخاف أوديها للميكانيكي ليقول لي محتاجة حتة سلك ولا حتة خرطوم
عارف البطاحة بتاعتها بكام؟
145 جنيه
عارف كوع البنزين عبارة عن حتة كاوتش 15 سم بكام؟
ب 65 جنيه من 3 شهور وأنا بأشتربه من حمدي لادا قال لي الدفعة الجديدة هيجي لي ب 75 جنيه
سيارتي محتاجة إسكاترة أنا خايف مجرد أسئل على سعرها
لكن 128 لو وقفت على الرصيف وبصيت يمين وشمال ممكن تلاقي قطع غيارها وببلاش
هو ودانا في داهية إلا غباء الروس في السلاح
لو كانوا خدموا أسلحتهم ووفروها ووفروا قطع غيارها كان زمنا بنصلي العيد في المسجد الأقصى
عرفت يا باشا ليه الفيات مش اللادا؟
لو رجع بي الزمن ليوم ما أشتريت اللادا أنا كنت اشتريت 126 أرحم ولا زيستافيا
حد يأخد لادا أوكا ويديني بدلها مروحة؟؟؟؟!!!!!
تصدق بالله مرة عطلت مني أمام العيادة سيبتها وروحت ماشي رجعت العيادة تاني يوم والله كنت على أمل تكون اتسرقت وحزنت لما لاقتها وقلت مكنتيش أنت اللي اتسرقتي بدل موبايلي السامسونج
يعني كنت على الأقل يبقى جت منها بدل نظرات اللوم اليومية من أمي ومراتي على شرائها وأبقى مجني عليه مش جاني في حق نفسي
يغور اللبن من وش القرود يا راجل