الحـاج / محمد
قابلته فى القطار المتجه الى اسوان سنه تخطى الخمسين نحيف يبدو عليه اثار ثراء قديم
حزين مش عارف ليه ؟؟؟ وساكت لايتحدث ابدا
ثم مرت ساعة واثنين ولم ينطق بحرف ولم ينام بل دائما مايكون موجها نظره الى خارج القطار
ثم جاء عامل البوفيه يجر عربة البوفيه أمامه
وينادى
حاجة ساقعة....نيسكافيه ..... ساندوتشات
التفت الحاج محمد فجأة وخاطبه / هات لى شاى
رد عليه عامل البوفيه / للاسف مش معايا شاى ........دلوقت يـيجى بتاع الشاى
وانتهزت الفرصة وكلمته فمشوار اسوان طويل والوقت يمر بطيئا وخصوصا ان القراءة فى وقت اكون مرهـقـا فيه تدعونى الى النوم
شكلك بتحب الشاى زى حالاتى .... صعايدة بقى ....
وابتسمت
ولم يرد
وانا اتـفـرست .... أو اتكبست ....وسكتـت
شوية وجاء عامل البوفيه الثانى / شاى .....شاى .....شاى
يابتاع الشاى
نعم
هات لى شاى
ثم فاجأنى وقال لى / تشرب معايا شاى؟؟؟
فرددت عليه بأدب وانا لازلت مكبوس / شكرا
والله لايمكن ....هتشرب معايا
اشكرك
نظر لبتاع الشاى
وقال / هات لنا 2 شاى
شكرا ....مش عايز
خلاص جبته... والراجل بـيـصبه اهو
وتـناولنا الشاى سويا
واثناء شرب الشاى
قال / اعذرنى يابنى ....انا كنت عشرى أوى ( اجتماعى ) واحب اتعرف بالناس لكن كثرة التعامل مع الناس بحسن نية بهدلتـنـى
ازاى ياحاج .... ثم انت اسم حضرتك أيه ؟؟؟.....انا ابنك خالد
اهلا بيك ياخالد....انا الحاج محمد
اهلا ياحاج
اهلا بيك
شوف ياخالد
اتفضل ياحاج
انا كنت ثرى جدا .....وعندى أموال لاتحصى ولاتعد
وبعدين
وطبعا ارتكبت ذنوب ومعاصى كتير ......واتجوزت 3 مع بعض ودايما كانت اللى تعجبنى والا قيها مستعصية عليا اتجوزها عرفى اسبوعين واسيبها .... غير الخمور والملاهى و.....و.....
وبعدين
ربنا اكرمنى بتوكيل اسمنت فى احدى المحافظات والبلية لعبت جاااااااااااااامد .....لدرجة انى من 15 سنة (حوالى سنة 1985 تقريبا ) كنت اصرف يوميا لايقل عن 1500 جنيه على ملذاتى وشهواتى غير مصروف بيتى
ياستار يارب .....يعنى لايقل عن 2000 جنيه يوميا
أه والله
وبعدين
ابدا اتعرفت على شلة من التجار وكانو اصحابى كلهم الروح بالروح وكنا نسهر يوميا للفجر
وبعدين
كنت ابقى راجع سكران طينة والفجر بيأذن وانام زى البهيمة للعصر
كمل ياحاج
وكان اخواتى اصحاب شركات مقاولات كبيرة لكن الشهادة لله كانو بيحافظو على فلوسهم مش بـيـهبـلو زى حالاتى
وبعدين
وفى يوم بدأ السوق ينضرب معايا والسيولة قلت عندى واضطريت اخد قروض من البنوك
قاطعته
وطبعا ربنا بهدلك بسبب القروض
ضحك وقال / بسبب القروض بس ؟؟؟؟؟؟؟ وبسبب البلاوى السودة اللى عملتها
ثم اكمل حديثه
انا غلطت كتير أوى يابنى
وانهمر فى البكاء كما الأطفال....... وارتفع صوته فى القطار
اهدى ياحاج وصلى ع النبى
بصوت مخنوق /عليه الصلاة والسلام ..... والله يابنى انا م استاهلش الحياة تانى
ياحاج ربنا بـيتوب على عبده العاصى
ثم تلوت عليه الأية القرآنية التى تقول
(قل ياعبادى الذين أسرفو على انفسهم لاتقنطو من رحمة الله ان الله يغفر الذنوب جميعا انه هو الغفور الرحيم )
صدق الله العظيم
والله يابنى ....انا حاسس ان ربنا مش هيغفر لى ابدا
مين قال كده ؟؟؟؟؟؟؟اومال ربنا اسمه الغـفـور والغـفـاروالتواب والرحيم ازاى وهو مش هيغفر لك ؟؟؟؟
انا عملت معاصى كتــيرة اوى
ثم انهمر فى البكاء مرة اخرى ......انها حرارة المعصية تحرقه ويحس بها كالجبل الجاثم (النائم) على صدره
هدى اعصابك وكمل كلام
ابدا وفى يوم فوجئت ان الفلوس بدأت تتسرسب من ايدى ومبقاش حيلتى حاجة وطبعا البنوك والتجار اللى ليهم فلوس رفعو عليا قضايا ....وسبت مكتبى وبيتى ومكانى واخدت مراتى وعيالى وسكنت فى محافظة تانية
وقررت اشتغل اى حاجة وكان معايا قرشين اشتريت بيهم عربية سوزوكى ووقفت بيها فى الموقف وبقيت اشتغل اهو يوم يجينى 100 جنيه ويوم 50 ويوم مفيش واهى ماشية
وبعدين
فوجئت باصحابى اللى كانو كل يوم عندى ونسهر سوا ابتدو يتهربو منى ومنهم اللى هاجمنى ومنهم اللى استلف فلوس ولما طالبته هاجمنى وشتمنى......حتى اخواتى قاطعونى بس هما كانو مقاطعيينى بسبب تفاهتى وهيافتى وشوية الصياع اللى كنت مصاحبهم
معقول ؟؟؟؟
اه والله ......المهم قلت ياواد خلينى فى شغلى الجديد والقرش اللى ييجى اعيش بيه وخلاص
وحصل ايه بعد كده؟؟؟؟
فوجئت بواحد صاحبى فى يوم واقف فى الموقف بيدور على عربية تنقل له شوية حاجات وجريت عليه
وقلت له /ازيك يافلان........وفوجئت انه سلم عليا بقـرف .... ولا كأنه يعرفنى
ايه الجحود ده ؟؟؟
الاسوأ من كده انه بعد كام يوم من بعد م شافنى فوجئت بيه جانى واخترع خناقـة وروحنا القسم وهناك الظابط بيكلمنى روحت مزعق فيه فشتمنى فمسكته ضربته علقة محترمة
مدهوشا / وسط القسم؟؟؟
أه والله ياخالد .... وطبعا اتلم عليا القسم كله وصاحبى معاهم ونزلو فيا ضرب
مدهوشا / وصاحبك معاهم؟؟؟؟
أه والله
ليه ؟؟؟
معرفش...... اتاريه كان عايز يحبسنى فاخترع حكاية الخناقة وروحنا القسم وكان متفق مع الظابط ...وطبعا ظهرت القضايا اللى انا هارب منها واتحبست 6 سنوات ونص متواصلة
لا اله الا الله ......أيه الناس دى؟؟؟
المهم ......وانا فى السجن جاى يزورنى ورفضت زيارته .... ولما سألت عن السبب مراتى قالت انه حاسس بغلطه وجاى يعتذر
ياسلاااااااااام
مهو انا حسيت انه بيضحك عليها وانه جاى يشمت فيا وانا مسجون فرفضت زيارته
وبعدين
خرجت وانا زاهد فى الدنيا ومش عايز غير ان ربنا يغفر لى
وانفجر باكيا مرة اخرى وهذه المرة لم يسكت واستغرق بكائه اكتر من نص ساعة حتى تمنيت ان يسكت وندمت انى كلمته وقلبت عليه المواجع
لكنا دموع التوبة
فـقـد قال رسول الله (صلى الله عليه وسلم )
عينان لاتمسهما النار ابدا
عين بكت من خشية الله
وعين باتت تحرس فى سبيل الله
صدق رسول الله
اللهم اغفر لنا وله ولكل المسلمين
اللهم امين يارب العالمين