السلام عليكم

أحب اشكر الزملاء جميعا وخصوصا المهندس سمير والدكتور حازم
والله انا بستفيد منكم كتير

حبيت احكي عن موقف حصل معايا
اعربيتي ماروتي 2010 عاملة حوالي 11000 كم
قولت اعمل الصيانة العادية عند 10000
رحت لميكانيكي ثقة انا اعرفه، قالي طقم الكهرباء عايز يتغير (البوجيهات والابلاتين كان لادع والكوندنسر)
جبت الابلاتين والكوندنسر من وسط البلد (الشركة اليابانية في التوفيقيه) وجبت البوجيهات من فيصل جنبي
لاحظت حاجة
اولا: البوجيهات اللي طلعتها من العربية (أول مرة أغيرهم من الزيرو) كان نوعهم NGK BPR5ES ياباني
اللي لقيته جنبي عند أكتر من محل هو NGK BP6EY ياباني
الميكانيكي قالي مش هاتفرق كتير هاتهم
غيرنا كل حاجة وتمام
مشيت اربع او خمس أيام تقريبا (حوالي 150 كم)
وعلى كوبري 6 أكتوبر
اذ فجأة العربية بتنتش
ومبرجلة
ربنا ستر وركنت على جنب
وجبت ميكانيكي وانا على الكوبري، فك العمة وفك الاسبراتير
وفك الأبلاتين وقالي الأبلاتين لادع (اللي لسة بقاله 5 أيام بالظبط) ولازم نغيره
رحت جبت الأبلاتين الجديد وركبته اشتغلت شوية كدة وبعدين اتبرجلت تاني
قلت للراجل شكرا وكلمت حد جه قطرني بالعربية ركنتها في الدقي وتاني يوم رحت التوكيل
قلت مابدهاش اعمل الصيانة عندهم (خصوصا اني كنت عامل الألف والخمسة آلاف) ويركبولي قطع الغيار الأصلية
سبت العربية الصبح ورجعت اخر اليوم كدة
قالولي انت غيرت طقم الكهرباء برة بس احنا ركبنالك طقم الكهرباء الأصلي بتاع العربية (أبلاتين وكوندنسر وبوجيهات)
بصيت على البوجيهات (اللي انا لسة مركبها مافيش 5 أيام اللي هي نوعها NGK BP6EY ) لقيتها متفحمة ولونها اسود وحاجة وحشة خالص، دا البوجيهات اللي طالعة من العربية وكان بقالها 10000كم كان حالهم احسن منهم
برضه الأبلاتين (اللي لسة برضه مغيره من 5 أيام) لقيته لادع


حاليا بفضل الله الأمور بقت احسن والعربية ماشية تمام، وخلاص هتابع مع التوكيل الصيانات الجاية عشان أضمن قطع الغيار.

انا بس عندي كام استفسار:
* هل اختلاف نوع البوجيهات يأثر على العربية بالشكل دا؟
* الكتالوج بتاعنا دا بتاع العربية اللي هي بتنزل في الهند بموتور انجكشن، هل دا يفرق في نوع البوجيهات؟
* بالنسبة للأبلاتين: الأولاني قعد قد 10000 كم ولقيته لادع والثاني ماكملش حاجة ولدع، انا احيانا بسيب الكونتاكت مفتوح عشان ببقى مشغل الكاسيت (لأنه مرتبط بالكونتاكت)، هل دا سبب يخلي الأبلاتين يلدع؟

آسف على الإطالة وجزاكم الله خيرا