الحمد لله ان عدت اليكم سالما
واشكر كل من سأل عنى ومن لم يسأل عنى
والله وحشتووووووووووووووووووووو وووووونى كلكم بلا استثناء
وفى الحقيقة كانت محنة صعبة و ربنا عداها على خير ولله الحمد
وبداية الحكاية
فى يوم 5 / 12 كنت عائدا من بنها ودماغى باااااظت وودانى وعينى من كتـر الكلام فى الموبايلات وقررت غلقهم هما ال 2 وشراء كيلو موز وركنت العربية واكلتهم وانا راكن على جنب مع انها كانت اول مرة اكل وانا راكن دايما باكل وانا سايق لكن لتهدئة نفسى عصبيا وجسمانيا من الشغل ورغى الموبايل
وبعد الموز وواحد شاى تقيل قررت استئناف الرحلة
وفعلا خرجت من بنها الى القاهرة ولان المزاج اصبح عنب وعال العااااااال قررت اسوق على مهلى واروح بيتنا على مهلى برضه
وكان الناتج ان رجعت الكرسى لورا علشان اسوق على سرعة لاتزيدعن 70
هنجرى على ايه ؟؟؟؟؟ ملوش لازمة الجرى
وقبل طوخ
انا طبعا فاهم ان اهل طوخ معظمهم يملك موتوسيكلات
لكن مشكلتهم انهم بيكسلو يعبرو الطريق السريع بطريقة قانونية
ولذلك ممكن تفاجأ ببوز موتوسيكل او موتوسيكل بحاله نط ادامك اوخرج لك من اى فتحة فى السور الفاصل بين الاتجاهين الرايح والجاى
وانا كنت حذرت من الموضوع ده فى موضوع دليل الطرق المصرية لاخونا الدكتور محمد
وفعلا
كاشف الطريق لحد آخر مد البصر وماشى على مهلى
وفجأة ............
خرج لى موتوسيكل من الشمال من وسط السور
خرج بحاله مرة واحدة
ولانى فاهم كسرت يمين خاالص بحيث ابعد عنه
لكنه
شاف عربية جاى تجرى بسرعة عالية من الشمال وخاف منها وطار ادامى
وطبعا صدمته
ورغم السرعة البطيئة نسبيا لكنه طار حوالى 5 متر
ووقع على الأرض
وكأى راجل محترم نزلت ولقيته فيه الروح وبيقول آه .....آه
ولما روحت له لقيته بيقول لى / معلش يا استاذ
ونظرا لادبه الشديد واخلاقياتى التى لاتسمح انى اسيبه
نقلته على المستشفى
وهناك
توفاه الله
وتم القبض على العبد الفقير
لكن
ولان ربكم لاينسى عباده
حدثت عدة اشياء ساعدتنى على الخروج من هذه المحنة
وطبعا تم وضع الاساور الفضية فى يدى (الكلابشات سابقا )وتم قيادة السيارة الى قسم الشرطة وانا مقيد وركنت السيارة اما م القسم ونزلت الحجز بعد عمل المحضر اللازم وحين اتت ام عمر لزيارتى اكتشفت ان مفاتيح السيارة لازالت معى
ياكرم الله
اديتها المفاتيح وقلتلها تجيبى فلان (احد جيرانى ) ياخد العربية حاااااااالا
وفعلا تم اخذ السيارة
وفهمت ان امين الشرطة اللى كان راكب بجوارى لم ينتبه انى اغلقت السيارة لان الريموت مش شغال وطبعا اغلقتها بمفاتيح السيارة ولم يرى اى انوار والا كان اخد باله انها اغلقت
واختفت السيارة
وهى اول دليل على الحادث
والحقيقة انا لست مخطئا والراجل اعتذر لى وهو مصاب وهذا وحده دليل برائتى
وطبعا
استدعانى الضابط النباتشى
وسألنى / فين العربية
انا / مركونة بره امام القسم
انت هتشتغلنى ياد انت ؟؟؟؟؟؟؟
اولا انا مش و اد ثانيا هيا مركونة بره هشتغلك ليه ؟؟؟؟ وأيه الاشتغالة هنا ؟؟؟
العربية مش بره ياكذا
انا بعصبية واضحة وزعقت / مش بره يعنى ايه؟؟؟؟ العربية اتسرقت منكم والا ايه ؟؟؟؟ والله لاشتكيكو فى الداخلية
واستمرت المشادة اكتر من ساعة انتهت بتهديد ووعيد بارسالى وراء الشمس بعدة كواكب كتيييييرة
وطبعا لم اتحدث فى الموضوع مع احد لانى اعلم تماما انه سيتم دس العديد من المجرمين الذين سيعملون كمرشدين (جواسيس ) لسيادته
وبعد كام يوم استعملت فيها عدة وسائل ارهابية وكبابية من اجل الاعتراف بمكان السيارة
ذهبت للنيابة
وتم اخذ اقوالى
وتم التحفظ على تليفوناتى المحمولة وتم تفريغ السجل ومخاطبة شركات المحمول لمعرفة اخر مكالمة كانت امتى ؟؟؟ والحمد لله كانت قبل الحادث بحوالى ساعة او ساعة ونصف تقريبا
وبالتالى تم استبعاد انى كنت اتحد فى المحمول مما أدى الى وقوع الحادث
ثم تم معاينة مكان الحادث ووجدو اننى كنت اقود سيارتى بسرعة اقل من القانونية (لأول مرة فى حياتى )
وبسؤال الناس اعترف الجميع ان قائد الموتوسيكل كان مخطئا لانه قطع الطريق فجأة وخرج من فتحة فى السور
ثم
هيا فين السيارة ؟؟؟؟ سند الحادثة والدليل القوى عليها
لكن ربك فوق الجميع (مش الأهلى او الزمالك )
واعطانى القاضى حكم بالحبس لمدة شهر لوجود متـوفى رغم ان اقل واجب فى الحكاية دى 6 شهور على الأقل
واستأنفت الحكم فاكتفى القاضى بمدة حبسى (25 يوم )
وخرجت بالسلامة وعدت امس الى البيت
لكن ماحدث داخل حجز القسم فهذا موضوع آخر
لانى كنت بتفرج على كل شىء يحدث حولى