إيه يا جماعه الكلام ده (مع إحترامي للجميع)
فرش لأرضية العربيه (جلد ومشمع)
إنتم متخيلين إنكم جبتم أفكار لكماليات في العربيات أكتر من إلي شركات ضخمه زي بي إم دبليو ومرسيدس عاملالها فريق بحث كامل.
لأ ونفذتوها كمان.
أنا عمري ما شوفت بي إم ولا مرسيدس مفروشه أرضيه جلد ولا حتي مشمع.
تفتكرو ليه؟
يمكن خايفين لا تمن العربيه يزيد فا محدش يقدر يشتريها بعد إضافة تمن المشمع لتمن العربية الأصلي
يا جماعه كل المطلوب هو دواسات موكيت (وليست حتي جلد ولا كاوتش) لحماية أرضية السيارة من الأوساخ.
ويمكن تحتاج كل كام سنه تغير الدواسة. وسيظل فرش الأرضية نظيف بدون أي أوساخ (وعن تجربه)
حيث تمتص الدواسات الموكيت (من نوع جيد ومناسبة لأبعاد أرضية السيارة) كل الأوساخ من أتربة لطين لعصائر ..... الخ
ويظل فرش أرضية السيارة نظيف لأطول فتره ممكنه.
متعملوش زي الي بيجيب تلفزيون جديد فا يحط الريموت في كيس بلاستيك للحفاظ عليه. ويفضل عايش متعذب طول عمره مش شايف الزاير من الكيس. وإرسال الريموت ضعيف. وفي الاخر ينتهي العمر الإفتراضي للتلفزيون ويرمي التلفزيون والريموت بحالة المصنع.
ولا الي مبيرضاش يشيل الاصق الشفاف من علي شاشة الموبايل وبيكون نصيبه زي بتاع التلفزيون. أو بيتسرق الموبيل والحرامي هو الي بيستفيد لإنو بيبيع الموبيل والشاشه بحالة المصنع.
أي فرش علي أرضية السيارة من مواد غير ماصة (مشمع أو جلد) سيجعل الأتربة تتجمع علي أرضية السيارة وتصدر أصوات مشابهة لأصوات أرجل التلاميذ داخل فصل دراسي بالمرحلة الإبتدائية.
ناهيك عن إذا سكب عصير مثلا علي أرضية السيارة. ستتجمع السوائل مكونة برك.
مش بعيد بعد ما تركبوا مشمع تحتاجو تعملوا مزراب (زي بتاع السطوح) ويبقي كل عربيه فيها شكمان ومزراب. (فل أوبشن)
الشئ الذي يعود بالنفع علي السيارة فعلا هو تغطية فرش المقاعد إذا كان من القماش بفرش جلدي. ومع ذلك أنا عربيتي فرشها قماش ومغطتهوش ولسه زي الفل. طبعا أكتر من مرة سكبت عليه عصائر بس العلم تطور والمنظفات تطورت وبقي في حاجه إسمها فوم لتنظيف الفرش زي الدراي كلين وشغال معايا زي الحلاوه.
ما تشوهوش منظر سيارتكم الجديدة وإستمتعوا بها لأقصي حد. علشان ميستنفعش بيها الورثة أو الشخص إلي هيشتريها بعدكم وتطلعوا انتم من المولد بلا حمص ومينبكمش غير دفع الأقساط والديون.