فقط بـــ100 جنيه مصري بس ظبط عربيتك جامد
السلام عليكم
انا لفيت كتير في اكسسوارت السيارات وشوفت وعرفت الحاجات الانسب للعربية
هقولك شوية حاجات وسعرها من اي مكان ده اعلي سعر اللي هقوله عشان فيه اسعار اقل
اول حاجه
الفاميه
هتفيم العربية مثلثات فقط اللي علي جانبي عربيتك ورا الابواب الخلفية
هتكلفك حسب عربيتك الجزئين من 5-10 جنيه
نصيحة : مش تفيم الازاز الخلفي ولا الامامي ولا اي ازاز لان المرور هيوقفك وهيخليك تنزله كله ده لو مرضوش ياخدو فلوس طبعا
ستارة كاشفة
فيه ستاره عمودين بسعر 25 جنيه وفيه منها ب 60 بس هات اللي ب25 هتعيش زي ال60 واحسن وهي هتبقي ورا علي الازاز كانك فيمت الازاز طبعا لحماية الكراسي الخلفية من الشمس
تغيير لون التابلوه و العداد للثلجي
هتجيب 4 لمبات بسعر 10 ج صيني لان مفيش غيره بس هاتها ن غير كعب
وهتغيرهم مكان اللمبات الموجوده في العربية
تغيير فوانيس الظل الاساسية للعربية
الفانوس اللي بيتفتح مع التابلوه اول تكه بس مش العالي ولا المتوسط
النور ده هتجيب لمبتين بسعر 5 جنيه بس وهتدي شكل تحفة
الطاره - الدريكسيون
هتجيب كوفر جلد سعره بيبدا من 20حد 40 واحسن شيء اللي هو ب20 جنيه يستحمل بيكون كوفر جلد حلو جدا بيديك احساس مختلف للعربية
وضع حامل موبايل في السيارة
هتجيب حامل لزق للسيارة للموبايل ده جميل اكسسوارات برده بس مهمه كل ده
وانا عارف انه ناس هتقول مش اكسسوار انا بتكلم لو عربيتك مفيهاش اي حاجه او شاري مستعمل جديد وعايز تروش العربية شوية ده سعره 10 ج من اي محل موبايلات
عطر التكييف
عطر التكييف هيكلفك 5 جنيه بس من اي موول محترم او اكسسوارت عربيات برده
احسب بقي كده معايا
فاميه = 10 جنيه
ستارة = 25 جنيه
لون التابلوه = 10 جنيه
فوانيس الظل = 5 جنيه
الدريسكيون = 20 جنيه
موبايل = 10 جنيه
كده 80 جنيه مصري بالتمام والكمال
وقول 10 جنيه مصنعيه للكهرباءي اللي هيغير اللمبات وده حد اقصي
وقول 10 جنيه فرق في الاسعار كمان يبقو 100 جنيه
بس العربيه هتكون مختلفه وهتحس انك راكب عربيه محترمه
انا عملت ده في عربيني كنت جايبها كركوبه مستعملة لانسر 93 بطة نبيتي
والموضوع ده جربته مع اصحاب كتير عربياتهم مختلفه
بس افضل الوان ده
النبيتي - الابيض - الاحمر - الاصفر - الاسود
وحسب الزوق
تحت امركم ويارب يكون الموضوع مفيد
انا بتكلم في اللي عايز يروشن العربيه ومش عايز يصرف طبعا اصحاب الخبره عارفين ان فيه جنوط ب 900 ج بس لوحدها وغيره بس انا قولت اجيب اكتر حاجات وتفرق في شكل العربيه وروح العربيه جدا وفي نفس الوقت مش عك دي حاجات بسيطه وجميله هتغير مذاق القياده لديك ان شاء الله
ارجو افادتكم
تحياتي
|