الموضوع مش مين احسن على الاطلاق لكن احسن بالنسبة لمين , عن تجربة شخصية بعد بلوغ سيارتى القديمة السنه الثانية عشر قررت بيعها و البحث عن سيارة اجد فيها ما لم اجدة فى القديمة فكانت عناصر البحث :
- سيارة عالية عن الارض علشان المطبات اللى عانيت منها
- اتساع داخلى لاستيعاب افراد الاسرة بدون اعتذارات و "معلش يا جماعة ساعوا بعضيكوا" ومن غير الشكمان ما يلمس الارض
- موتور قوى يشغل التكيف من غير ما العربية تتكتف
- شنطة واسعة تاخد شنط السفر الكبيرة بدلا من وضعها على الكنبة
- سعر اقل من 70000 جنيه
- عوامل امان و ثبات على الطرق و مع الفرامل
- محرك بسيط فى تشغيله ولو ان ده بيقلل من قوته بس بيسهل صيانته و تكلفتها
- شركة موثوق فيها وفى مستوى انتاجها وسمعة وكيلها
فوجدت كل احتياجاتى متوفرة فى الرينو اللوجان وبالبحث عن تاريخ تصميمها و صنعها اقتنعت بها وبمعاينتها وجدت الصاج قوى مقارنة بالغير و بالسؤال عن قطع الغيار وجدت محل بجوارى يبيع قطع لغيار باسعار اقل من اسعار الوكيل المعلنة -صناعة تركى- ده غير الاستيراد لان العربية بقالها كام سنه فى اوروبا ومعدل انتشارها اللى بيتزايد حا يزود انتشار قطع الغيار اما بالنسبة لسعر اعادة البيع فلست من هواه التغيير او البيع و لما ييجى وقت البيع حاتكون الدنيا غير الدنيا ان شاء الله فصليت استخارة و وفقنى الله لشرائها
بس كل ده كان تجربة شخصية لي و اكيد كل واحد له احتياجاته المختلفة المهم يحسبها صح
فيه عامل تانى فى الشراء ما احبش احطه كعنصر تقييم هوه انى حبيتها من اول نظرة
واول سيارة فى حياتى -سيارة والدى - كانت رينو 4cv زى اللى فى الصورة المرفقة وربنا يوفق الجميع للخير