[AbOnOrA]

يا فتاح يا عليم يا رزاق يا كريم
هحاول اجيب من الاخر واختصر ولو انى عندى كلام كتير اوى فى الموضوع ده

اولاَ ديه لا اول مرة ولا اخر مرة يحصل فيها ان عربيه جديدة (وغالباً ما بتكون صينى او كورى) تنزل بسعر كويس وشكل جديد تخطف اعجاب مجموعة من الناس يشتريوها ويفرحو بيها لكن دائما يبقى فيه ناس ترتدى عبائه الحكيم العليم وتقعد تطلع فى عيوب وبلاوى فى العربيه وتنتهز كل فرصة فى مشاركة او موضوع علشان تخش تمصص شفايفها وتقول يا حرااااااااااام راكبين عربيات تعبانة
يا حرااااااااااام جابو عربيه ولبسوها

طيب يقوم ملاك العربيه يعملو ايه ... طبعاً يتنفرزو ويتحرق دمهم ويردو بعصبية وطبعاً هيغلطو وينتهى الموضوع لقسم الشكاوى او المحذوفات

الكلام ده اتكرر على مدى اكتر من 4 سنين لحد دلوقتى شوفته ايام ماكنت عضو فى كونتكت وبعدين لما كنت مؤسس وادمين لنايل وبعدين هنا فى مصر موتورز نفس السيناريو مع اختلافات بسيطة
ايام نايل اضطرينا نعمل قسم خاص بملاك الاسبيرانزا لحمايتهم من غلاسات الناس وفبعدين راحو عملو منتدى لوحدهم خاص بيهم (اسبيرانزا كلوب) وقفلوه على اعضاء العربيه لحد ما اتخنق وطق اتقفل
فى نايل بقو شلل وعصابات وكل مجموعة فى القسم بتاعها بتدافع عن بعض ضد اللى يخش عليهم جديد ولما تولع اوى الشكاوى والانذارات ولجنه فض المفرقعات جاهزة

انا بقى مينفعش اعمل زى ده ولا زى ده
والكلام على العموم جاك اسبيرانزا لانسر بومة كيا سيراتو رينو ميجان او لوجان وكل العربيات المتنازع عليها ان صح التعبير
مقدرش ادى ضمانات كاملة بالحماية لمجموعة ملاك عربيه وكارت بلانش يضمن ان اى حد مش عاجبهم يشتموه ويبهدلوه
لكن اقدر اقول واحاسب اللى يتعمد المشاركة بشكل غير موضوعى عموماً ضد اى سيارة او منتج لاسيما لو كان بيتريق كمان
لكن واحد جايب اختبار تصادم مثلا ولا تقرير بالارقام ومصادر وحجة واضحة يبقى نرد عليه وزى ما بيتكلم فى صلب الموضوع ارد عليه بدون شخصنة او الالتفات ليه شخصياً ومهاجمته
فقط الحجة بالحجة والرد والدليل
ديه مش صعبه على ناس كبار سناً ومكانة وعلماً وثقافة

تخيلو النقاش لو بقى بالشكل ده هيبقى راقى ومفيد للكل
مش بس كده احنا كإدارة بندعم دائماً التخصص ويسعدنا المساهمة فى تنظيم اى عمل فيه مصلحة ملاك اى سيارة
بداية من المقابلات حتى عروض الصيانة والتخفيضات

للاسف انا مش مختص بالبت فى الشكوى ادارياً بس انا بتكلم والله بمنتهى الوضوح والجدية من منطلق اهتمامى بدعم ملاك العربيه وحرصى عليهم فى نفس الوقت فلو تقبلو رائى الشخصى تساوا الموضوع ده بشكل ودى لانه اذا كان غلط طاق فانتو غلطو فيه اتنين وكده كله هيطلع غلطان وزعلان
فاكيد ده مش احسن وضع ولا ايه رايكم