[sad-bird]

السلام عليكم
اخي الكريم
حضرتك الناس لما قالت الاقتراحات قلنا على اساس انك عاوز تغير الماتور خالص اما عن المشكلة من البداية وخطوات الحل
1. تشوف ميكانيكي كويس يعمل العمرة ده لو عاوز توفر وتلم الدور وتعمل عمرة وتمشي بيها بماتورها بس خلي بالك لو المياكنيكي مبيفهمش يبقى هتتكلف اكتر ما هتسقط ماتور جديد
2. تشوف الرادياتير وتكشف عليه وتسلكه ولو صغير ممكن تزوده بواحد اكبر 3 ماسورة الماني ده في حال ان القديم مكتوم او مش مظبوط
3. لو السخونية سببها حاجة في الماتور المفروض ان الميكانيكي هيعرفها لو بيفهم
4. لو عاوز تريح دماغك من القرف وتخلص خالص وتسقط ماتور يبقى خيار من اثنين يا تجيبه من اي حد بتاع استيراد في محل اقامتك علشان السفر والبهدله يا اما تنزل بورسعيد وده اقتراح الاخوة الافاضل والحكمة منه ان بورسعيد مليانه تعديل سيارات وفيها جميع المواتير لطبيعتها الاقتصادية من ايام الجمارك وفيه هناك كل حاجة من الابرة للصاروخ وكمان فيه ورش كويسة واعتقد الصديق حسام البورسعيدي يقدر يفيك اكتر مننا في موضوع الورش ده وفي نفس الوقت تقدر تبيع الماتور القديم هناك وتدخل ثمنه في الجديد
5. الماتور اللي هيتسقط عندك ايا كان نوعه من الافضل يجي بالفتيس بتاعه علشان نسب السرعات الا لو هتجيب الماتور نفس اللي عندك بالضبط يبقى مش محتاج تغيير الفتيس الا لو فيه مشكلة في القديم
6. بما ان العربية حوضها زي 128 يبقى ينفع يتسقط عليها كل المواتير اللي تنفع تتسقط على 128
7 . اي ماتور من ماركة فيات ينفع يتسقط على عربيتك ويترخص في المرور بس قبل ما تروح تشتري اوصل مشوار للمرور اسأل هناك علشان تبقى رايح وانت مطمن ومتنساش وانت بتجيب الماتور من اي مكان تجيب معاه الافراج الجمركي بتاعه علشان الترخيص في المرور )
8. اقتراحات المواتير اللي قلنالك عليها قلناها على اساس انك تقرر براحتك عاوز تعمل ايه لان ممكن تكون عاوز تعلى الاداء والسرعة وفي الحالة دي هتتطلب تعمل الحاجات الي قلنا عليها لو اني من راي مهندس سمير ان بلاش تعديل كتير ويكفي التقويات للشاسية تحسبا للتهالك بتاعه بسبب الزمن
9. لما حد يقولك على اختيارات عالية زي ريجاتا 1500 او 1600 انجكشن ده بيكون لان المواتير دي ينفع يركبها تكييف وبالتالي لو في يوم قررت انك تركب تكييف للعربية يبقى تغير التابلوة وتركب تكييف لكن المشكلة ان الماتور نفسه هيبقى عاوز تدعيم للشاسية ودي نقطة انت مش حاببها ( وانا كمان ) يبقى تخلينا في مواتير فيات وريتمو 1300 والفرق بينهم وبين ماتورك مش كتير خصوصا ان محدش عارف اذا كان 1100 او 1300 ( مع ان المفروض الكلام ده مثبت في الرخصة )
10 حدد انت في أي مكان بالضبط علشان اللي يدخل وعاوز يدلك على حاجة يقدر يقولك لو يعرف سواء مياكينكي او قطع غيار
11 انا تحت امرك في اي استشارة (في حدود علمي ) طبعا فيه ناس متخصصة اكتر مني في المنتدي تقدر تقول رأيهم افضل مني بكثير ويقولولك على الخلاصة