[سيف الدين سعيد]

اخويا العزيز . حاوضحلك الموقف بس شويه عشان ماتبقاش الأمور فيها اى لبس بالنسبالك .
العربيه وهى فى مصنعها . الصاج دا بيدخل على المكابس عشان ياخد الإسطمبه بالشكل المطلوب طبعا . وهنا مابيكونش فى العمليه اى خطأ او عيب . وفى نفس العمليه بيتم فتح الصاج عشان الفتحه تكون مظبوطه . ولما بيتكبس الصاج بيتعمل حساب ان شفة الصاج المحيطه بالفتحه تكون متنيه بالكابس طبعا الى الداخل بحيث ان حرفها مايكونش مكشوف .
بعد كده بدخل الصاج على مراحل العزل بالطبقات المختلفه عشان يطلع بلونه النهائى الأسود زى ما حضرتك بتشوف قطع الغيار اللى بتتباع من رفارف او كبوت او شنطه .... الخ . وهنا بيخد السقف كفايته من العزل الكامل لكل منطقه فيه وبالطبع المحيط بفتحة السقف بيكون معزول جيدا . ويدخل بعد كده على التجميع فى جسم السياره ثم الطلاء .. وبعد كده طبعا بتركب الكاوتشات المانعه للمياه بعد كده بتركب ماكينة السقف والتحريك وبيتم اختبار كامل على تسريب المياه للتأكد من عدم نفاذ اى ذرة ماء منها .
وكمان فى فتحات احتياطيه بتكون موجوده عشان تسريب اى مياه تتواجد فى هذه المنطقه فورا عن طريق مزاريب بخراطيم موصله الى فتحات فى اسفل السياره .
المهم ان مشكلة الصدأ والبارومه مش بتظهر فى العربيات اللى بتكون نازله بفتحة سقف من مصنعها . انما فى العربيات اللى بيتعملها فتحة سقف ( عموله ) هنا فى مصر . ودا طبعا لعدم وجود مرحلة العزل لحواف الصاج فى منطقة الفتح . وكمان نوع الكاوتشات اللى بتكون غالبا مصرى من نوع رخيص فبتنفس وتجمع مياه تحتها . ارجو انى ماكونش اطلت عليكم . بس حبيت اوضح توضيح بسيط على حد علمى . وانا شخصيا كنت باتمنى ان عربيتى تكون بفتحة سقف حتى لو حاعمل لها اسبيشيال اوردر مخصوص من بلدها . بس عنصر الوقت ما ساعدنيش .