[Injection]

الأختيارات أنت قولت معظمها, ياتجيب عربية جديدة تربو, سواء جولف أو فيات لينيا أو بونتو.

الحل التانى اللى أنا بفضله, هات عربية شاسيه وأساسات سليمة والباقى مش مهم, وأعملها من أول وجديد.

مثلا البى أم الشارك, وسقط المكنة ال 2.5 وتربنها, وهيبقى معاك صاروخ, قوة رهيبة ووزن خفيف, أو حتى خليها بموتورها بس تربنه.

أو هات لانسر كريستالة, وسقط موتور مايفك وتربنه, أو أقلبها أيفو, نصين الأيفو الأستيراد فى حدود 20 ألف جنيه, بس هيبقى نصين أيفو 4 غالبا, أو سقط الموتور ال 2.4 وتربنه برضه, هيبقى معاك عزم وباور خيالى.

الهوندا أنا مش من كبار معجبيها بصراحة, بس الهوندا عموما هيبقى صعب توصل بال vtec لتسارع كويس فى 7 ثوانى خاصة لو مش متعود على العربية أو الموتور مش مظبوط, بس بعد ماتجمع سرعة هاتطير من على الأرض.

عايز راحة وعربية جميلة وشكلها حلو تقضى الغرض وكماليات وتجرى ومن غير تعب, خليك فى الموديلات الجديدة أحسن زى البونتو أو الجولف والأبيزا, عايز تعمل عربية وتعدل براحتك, ويبقى معاك عربية معروفة بالأسم, هات حاجة بى أم أو لانسر وعدل فيها من أولها لأخرها براحتك.

بس الجديد عمره ماهيبقى زى لانسر متعدلة أو أيفو أو بى أم, غالبا مش هتوصل للقوة اللى ممكن توصلها لانسر مايفك تربو, بس مش هتتعب فى الموضوع.

وعلى فكرة لو معاك عربية 1000حصان عمرك ماهتعرف تجرى بيها فى البلد هنا, غير أنها هتتعبك جدا, السرعة والقوة ليها حدود, بعد كده مالهاش أى لازمة.

وال 130000 جنيه ميجيبوش عربية جديدة قوية ويعدلوا عليها, أو حتى مستعملة, ده البى أم العادية ال 2004 بتعمل حوالى 90 ألف!!!

بس ممكن تجيب واحدة حالتها حلو وتطلع على عمو ميدو (ميدو بريفورمانس), وتركب تربو على الموتور الأصلى, وتطير.

الموضوع كبير وعايز دراسة, ربنا يوفقك.