تحية وتقدير لكل أعضاء هذا المنتدى
عندى كام حاجة كدا عملنلى قلق شوية،، أولا بحس ان الموتور عالى شوية مع ان معنديش ار بى ام فى العربية بس بحس انه ساعات كدا بيعلى معايا وبحس اكنى كابس سنة بنزين مع انى شيكت على الواير والبكرة بتوع البنزين ومفيش فيهم اى مشاكل...
ثانيا: ليه العربية اما تكبس لها بنزين ساعات قليلة وانا مثلا على الأول او الثانى وكبست على البنزين بحس ان العربية بتخنق وبعد كدا تكسب عادى مع العلم انى مغير رشاشات اللانوس بأكسنت
ثالثا: صوت مجننى من ساعة مجبت العربية ومحدش عارف يوصله وانا بينى وبينكم زهقت وبنسى نفسى وبعلى الكاسيت علشان مسمعهوش... الصوت بقى عامل زى صوت صامولة مفكوكة او مسمار مفكوك من ناحية الفردة الشمال كدا بسمعه امتى بقى فى النقر الصغيرة وانا ماشى على الأول او التانى ولما احب اسمعه ويوحشنى صوته بطلع بالعربية على التانى ترج طبعا العربية وتسمع صوت التنقير الرذل دا ياريت الاقى حد فى النقطة دى بالذات يساعدنى لأنى خلاص تعبت منها...
رابعاً: صوت تكة فى الدربياج مع النقلات ساعات بسمعه وانا بشير رجل من على الدبرياج بسمع صوت تك تك تك كدا ومثلا لو ماشى فى اشارة زحمة بشيل رجلى من على الدبرياج خفيف العربية بتطلع معايا خفيف قوى كدا بحس بحاجة بتحك فى الدبرياج وصوت خشونة كدا فى اول طالعة الدبرياج،،، بالإضافة طبعا لصوت ونة مع السلانسيه ودى طبعا بلية ياترى الحكة دى بتكون من الفرش ولا ايه؟؟؟
العربية لانوس 1 موديل 99 عاملة 151 ألف كيلو
معلش انا طولت وغلست شوية وأكون شاكر ليكم المساعدة