رد: أدب الرحلات
كل يوم لازم أدخل على الموضوع أقرا القصص والحكايات وأخرج منه, وللأسف مبعرفش أعلق عليها سواء لعدم وجود وقت, أو لعدم وجود نت
دكتور محمد Miam حضرتك غيرت مفهوم الدكتور عند ناس كتير أنا منهم, وعرفنا من حكايات حضرتك أن الدكتور بيطلع عينه على مايبقى دكتور فعلا, وبيضيع سنين من عمره فى التعليم وفى أماكن نائية, عقبال الزمالة البريطانية
خالد باشا, أنا مش هقول غير أن كتابات حضرتك بتفكرنى بالسلسلة بتاعة الأبنودى اللى كان بيحكى فيها مواقف من حياته, بس كتابات حضرتك أفضل وأكثر تنوعا وأثارة, وخاصة المقالات وشرح حضرتك لنظام القطارات, أنا مركبتش قطر غير مرة واحدة ومش فاكرها, وكتابات حضرتك هتفيد الواحد جدا لو قرر يسافر بيه 
والشاحاتين دلوقتى فى كل حتة, وبالمواعيد كمان, وتلاقيهم بيبدلوا مع بعض عند الأشارات والسلالم, واحد الصبح وواحد بالليل, أو واحد ياخد أيام معينة والتانى باقى الأسبوع, واللى بيدى فلوس لشحات, الأولى يديها لجمعية محترمة وهى توصل الصدقة لمستحقيها, الناس اللى عندها كرامة وضمير عمرها ماتشحت ولو هتموت من الجوع, على عكس الشحاتين اللى بيكسبوا بالألاف من الأشارات.
والناس اللى بتبقى معاها فوطة دى بالقطهم بالرادار, أشوفه وهو جاى من بعيد, لأااااااااااا, مش عايز أمسحها سيبها بترابها, أنصرف أنصرف , ربنا يخرجنا منها على خير.
ونيجى لحبيب قلبى بقى, أيه يادوك فينك, كل ده مستخبى مننا, أكتئاب أيه وبتاع أيه بس, دى كلها هرمونات ومورفينات وشغل كبير فى المخ, كبر الجمجمة وفكها بقى.
عمال تجيب فى سيرتى وسيرة كلية الهندسة, ماتقلبش علينا المواجع بقى.
بس على فكرة أحنا برضه جامدين قوى, وحضرتك غلطت فى التسميات قوى, وسبت الموضوع فى الخباثة من غير معلومات عن أى حاجة, أسمحلى أسلى نفسى وأصحح:-
ال oscilloscope أو الأوسكيلوسكوب بيستخدم فى توضيح الموجات الكهربية على شاشة عادية, يعنى بيجيب أرتفاع الموجة, وترددها وقوتها, وليه أستخدامات كتير فى مجالات الصوت والكهرباء وتحليل الأشارات, عامل زى جهاز رسم القلب, وده شكله
وال solenoid, بيستخدم فى التحكم فى تدفق سائل أو فتح بوابة, وأكثر أستخدام للسيلينويد حاليا فى الرشاشات بتاعة أنظمة حقن الوقود, زى الرشاش اللى فى الصورة الشخصية بتاعتى, أساسه سيلينويد بيفتح لما بيمر فيه تيار كهربائى, وبيمر من خلاله الوقود, التيار يقف السيلينويد يقفل.
وبعدين الجى أم ده لفظ مصرى يادوك, الأصل Amplifier اللى هو المضخم
والهيت سينك Heat sink أبسط ترجمة ليه راديتير, اللى هو بيبقى محطوط على المكونات الحرارية اللى بتسخن علشان يوزع الحرارة, زى اللى بيبقى على البروسيسور بتاع الكمبيوتر
وبعدين مالها ويكيبيديا يادوك, حد لاقى, شكل حضرتك مرحتش معرض الكتاب من فترة
ياريت الواحد لقى حد يعلمه شغل الدوائر, النت مينفعش فى الحاجات دى خالص, عايزة شرح عملى.
والدوائر على النت كتير, بس عايزة واحد ساكن فوق النخيلى علشان يعرف يشترى ويبدل فى المكونات براحته.
وخد الموقع ده بقى هدية منى
http://instructables.com
ومتزعلش يادوك, الحياة قصيرة, مش هتستفيد حاجة لما تزعل على حاجة زائلة, عيش حياتك, وسيبك من اللعب اللى الهرمونات والمخ بيلعبوها علينا.
وكل يوم ثلاثاء وحضراتكوا طيبين
|