المقالة (11 )
خطايا الحكومة والشعب
اخونا الدكتور محمد زعلان من الحكومة انها سايبة قطارات المنصورة فى حالة سيئة
للاسف الشعب هو اللى بيعمل فى نفسه كده
مش الحكومة وحدها
يعنى الشبايبك المكسرة دى سببها
اما العيال اللى بتحدف القطارات بالطوب و...دى حكيتها مرة فى الموضوع ده وكانت واحدة قاعدة جنبى وماسكة ابنها الرضيع على ايدها ودخلت الطوبة اخترقت الزجاج ودخلت جوه عين الطفل وطبعا هيا كانت نازلة دمنهور واضطرت نزلت طنطا ونزلنا انا و2 تانى معاها وديناها مستشفى السكة الحديد خلف محطة طنطا وال 2 اللى معانا زوغو لانهم حسو ان مصالحهم اهم
لكن انا بقيت معاها ورجعت بيها على المحطة وركبتها القطار الى دمنهور
شوف كام واحد اتعطلت مصالحهم غير الزجاج اللى انكسر
وانت هتلاحظ ان الزجاج المضروب بطوبة عامل شبكة سرطانية زى شبكة العنكبوت كده
والسبب التانى الركاب انفسهم
لان القطار وهو داخل من التجديد اول مرة للاسف عمال الهيئة اللى جددوه مفيش عليهم رقابة وبيشتغلو كـأن فى حد تانى غيرهم هيركب رغم انهم كلهم بيركبوه وبيستعملوه لانه ببلاش بالنسبة لهم
ومع ذلك مفيش ضمير والقطار بيسلموه شبابيكه كلها مغلقة
ييجى المواطن يفتح الشباك
الشباك ميفتحش
ونظرا لان معظمنا مرضى بداء القوة مش المخ والعقل والفكر والتصرف الحكيم
فيكون التصرف انه يروح ضارب الشباك بأيده يكسره ......ويرميه تحت الكرسى ... أو يرميه من القطار
واما السبب الثالث
ان يسرقه تجار الخردة وغالبا ما تكون اعينهم موجهة للارفف لان كلها حديد
وفى كل الأحوال
الهيئة عندها جداول صيانة ....غالبا لاتـنـفـذ
يعنى القطار دخل الخدمة الصبح
انكسر الزجاج او اتسرق الرف الضهر
المفروض ....المفروض ...المفروض
انها مش هتغير اى حاجة قبل 3 شهور...ومكتوب تاريخ التجديد على كل عربة تحت رقمها ستجد جملة تقول /دخلت الخدمة فى 26/11 / 2010
وبجوارها 4 ارقام بين اقواس (3)(6)(9)(12)ومعناها صيانة بعد3 شهور ثم 6 ثم 9 ثم12فأذا دخلت صيانة ال3 شهور...فبعد خروجها..يتم وضع علامة شطب صغيرة على رقم 3 وهكذا
واللى بيحصل ان القطارات غالبا ما تسير بأعطالها الغير جوهرية (بالنسبة لهم طبعا ) مثل الرف والشباك والتكييف المعطل مدة تزيد عن السنة
ماعدا التكييف فهو يستمر بالكتير شهرين يكون الركاب ضربو الكمسارية واهانوهم وشتموهم وهما ملهومش ذنب لكنهم هما اللى بيواجهو الراكب
والراكب فاهم انهم السبب
وكثيرا ما انقذت كمسارية من الضرب فكان ان تحول الناس عليا بالاهانة والشتيمة معتقدين انى زميلهم
وأذكر قبل عهد منصور الغير سعيد
كان قائد القطار حين يدخل فى الميعاد الى المحطة النهائية كان يترك القيادة للمساعد ويقف على الباب مزهوا بنفسه وكأنه فعل أكثر من المطلوب منه
وستجدون فى احد الصور احد السائقين يشير بيديه بعلامة النصر لانه وصل فى الميعاد ولن يفهم احد هذا المغزى الا من يعرفون نفسية السائقين ويلاحظها مثلى
والمشكلة ان بعض الركاب حين يتأخر القطار
ينزل من القطار
وينزل شتيمة فى السائق
طب السائق ذنبه ايه ؟؟؟
فتحت الاشرة بيمشى قفلت بيقف وميقدرش يتأخر لانهم بيخصمو الحوافز
وزمان قبل منصور كان هناك موظف موجود فى السكة الحديد وظيفته فقط الكشف على اى قطار قبل خروجه الى رحلته ولذلك اى قطار يقف قبل موعد قيامه بنصف ساعة كاملة او المفروض يتم الكشف عليه فى الورش
طب ده بيتم ازاى
عن طريق ارقام العربات
ستجد كل جرار وكل عربة (والمترو أيضا ) عليه رقم مكون من 3 ارقام وحرف
فيكتب مثلا فى دفتر موجود معاه
العربة رقم كذا حرف كذا بها شباك رقم واحد يمين مكسور زجاج ورقم 3 شمال مكسور شيش وهكذا والمفروض انه بناء على هذا التقرير يتم الاصلاح فورا
وفى عهد منصور اختفى هذا الموظف
وفى يوم وجدته فى احد القطارات وانتهزتها فرصة فأنا لم اراه منذ زمن
وسألته / التقرير ده بتعملو بيه ايه بعد كده ؟؟؟
فقال بلا اى اهتمام / بنرميه
فتعجبت
ولما بترموه بتكتبوه ليه؟؟؟؟
علشان التقرير السنوى بتاعى
تقرير ايه ؟؟؟؟ انت من يوم م وصل منصور وانت وزمايلك اختفيتو
فقال / موجودين بس لما لقينا محدش بيسأل فى التقارير بتاعتنا ......هنقرف نفسنا وننزل الورشة والهدوم تتوسخ او نركب قطار وقف على الرصيف والراكب ده يتريق (و..دى انا شفتها / واحد بيمارس عمله بتتريقو عليه ليه؟؟ )وده يهزر ...وده يلقح بكلام ...
فمبقيناش نطلع من مكاتبنا
ومنصورومساعدينه بيعملو ايه ؟؟؟
ياعم هو فاهم حاجة؟؟؟
وطالما الكبير مش فاهم طبيعى ان اللى تحت منه يستغلو كده
وأيقنت بمصيبة قريبة وروحت البيت
جمعت العائلة وجبت ورقة وقلم وكتبت وصيتى ....وبعدها بشهرين تقريبا حدثت حادثة قليوب المرعبة
هذا غير الممارسات المتعددة للناس
مثل سرقة لمبات الكهرباء وتعجبت حين سمعت سعرها فتمنها 5 جنيه ونص والهيئة تاخدها ب حوالى 11 جنيه او 22 جنيه تقريبا لا اذكر السعر
وحنفيات القطار ...والكراسى أحيانا
واعجب سرقة رأيتها ولن تجدها الا فى افلام توم وجيرى فقط حيث كوميديا اللا معقول..... مثل انفجارقنبلة فى توم او جيرى فتجدها هبـبـتـه بدلا من قتـله
هذا ماحدث بالضبط
سرقة كابلات الاشارات من دمنهور حتى سيدى جابر وهى مسافة حوالى 56 كيلو
مش 56 متر... ويومها قطعنا المسافة من دمنهور لسيدى جابر ف 3 ساعات (المفروض 35 دقيقة فقط )
ده لو فصل الكابل عن اول اشارة هتبان السرقة لان الشاشات اللى بتراقب المنطقة دى هتفصل وبالتالى لابد من ابلاغ مباحث السكة الحديد فورا لسرعة القبض على الجانى
وتخيل كل 500 متر تقريبا اشارة ومع ذلك تم فصلهم كلهم بطول 56 كيلو والحفر واستخراج الكابلات وتحميلها والسير بها دون اعتراض اى احد
ولما عملو اعلانات فى التليفزيون عن سرقة الركاب للقطارات
اعترض بعض الصحفيين بأن هذا الكلام يقول ان شعب مصر كله لصوص واختفت الاعلانات
ومع الاسف..... هذه هى الحقيقة
وكنت قد كتبت مقالة لا أذكر هنا او فى موقع المصرى اليوم
بعنوان / انتحار شعب
واعتقد انها فى المصرى اليوم لاننا اختلفنا عليها ولم تنشر هناك
وذكرت فيها كثير من السلبيات التى رأيتها اثناء رحلاتى من زبالة الى ميكروباس الى اتوبيس الى قطار الى مجارى ولكن ركزت اكثر على تصرفات الناس
احنا اللى بندى فرصة للحرامى انه يسرق
لما اشوف واحد ركب من بنها ونازل بركة السبع (حوالى نص ساعة ) وطلع على الرف وخلع اللمبة النيون لكى تنطفىء وينام ثم رماها من الشباك ولما كلمته
فقال / انت مالك
قلت له / ده مالى ومالك ومال الناس دى كلها وانت بتدى فرصة لواحد حرامى بيجيب دى ب5جنيه ونص ويوردها للهيئة ب22 جنيه
و...رد بكل ثقة / يعنى هيا جات عليا ؟؟؟
يعنى بهذا المنطق مطلوب مننا كلنا التخريب والسرقة لان فى ناس معندهاش ضمير بتخرب وتسرق
و..رد بنفس الشجاعة / اهو احنا مش مودينا ف داهية غيرالفلسفة الفارغة بتاعة اللى زيك
اذن ....احنا اللى بندى الفرصة للحرامية واللصوص انهم يسرقو
وأرجوكم مش عايز دفاع ....بدل الدفاع نصلح من انفسنا
مين بيستعمل منديل ورق ويرميه فى الزبالة
او يحطه فى جيبه لحد م يلاقى صفيحة زبالة يرمى فيها بدل م يرمى فى الشارع
مين بيرمى تذاكر المترو أوالاتوبيس فى الزبالة مش فى الشارع
مين بيقف بعربيته فى اشارة العباسية او اى مكان بعد 2 بالليل لانها حمرا ومبيسمعش كلام وشتيمة ااااااااااااااد كده من غيره من قائدى السيارات ده اذا عملها اصلا
للاسف رأيت التزام الناس فى اشارات وسط البلد ورمسيس والمهندسين ومصر الجديدة ......ليه ؟؟؟
لان فى كاميرا بتصور يعنى مش نابعة من داخل الانسان لكنه منطق العسكرى والخوف من المخالفة
كلامى لن يعجب أحد
للاسف
لكنها .... الحقيقة
انه
انتحار شعب