[حسام البورسعيدى]

اللوجان عربية ممتازة يا كبير واعتقد احسن وارخص عربية فى فئتها ..

انت لو هتقارنها بالفيرنا هقولك الفيرنا موتورها احسن من اللوجان 1600 CC و 16 صباب .. والعربية خفيفة على الموتور علشان كده العربية سريعة ..

لكن يعيبها انها ضيقة عن اللوجان والشنطة بتاعتها عادية مش زى شنطة اللوجان الجبارة .. وكمان مفيهاش اى اوبشنز غير الباور والتكييف والازاز .. لكن اللوجان فيها اير باج ومرايات ضم كهربا وباور وتكييف وامكانية تعديل ارتفاع الانوار ..

اما الساجا طبعا اللوجان احسن منها بكتير جدا وده كلام ميختلفش عليه اتنين ..

واكيد طبعا عربية مكونات فرنساوى وتقفيل رومانى احسن من اسبيرانزا الصينى .. على الاقل الحمد لله عمرنا ما سمعنا عن حد اشتكى من عيب فى اللوجان فى حين ان فى ناس كتير اشتكت من اسبيرانزا وخصوصا 516 ..

اما هيونداى i10 عربية كويسة ولكنها فئة تانية خالص عن اللوجان (مينى) ومينفعش نقارنها باللوجان ..

والبونتو عربية كويسة برضو كعربية ومن احسن بدائل اللوجان اللى انت قلت عليها لكن يعيبها قلة قطع الغيار لانها مش منتشرة والصيانة واعادة البيع اعتقد هتكون صعبة .. بس للامانة انا معلوماتى عنها مش قد كده فتقدر تتاكد من باقى الاعضاء بخصوص البونتو ..


يعنى باختصار اللوجان هى افضل عربية فى مصر دلوقتى فى نفس الفئة السعرية ..



اعتقد حاليا اللوجان السيدان منتشرة اكتر من الهاتشباك ومجربة لكن الهاتش باك لسة منتشرتش اوى فمش هقدر اقولك على اى واحدة افضل .. لكن عموما هما الاتنين عربية واحدة ونفس المكونات والصناعة والفرق بينهم هو الشكل فقط ..


بالنسبة لسعر اعادة البيع مقدرش اقولك انهى واحدة تتباع اسرع (السيدان ولا الهاتشباك) لانها عملية رزق .. لكن عموما المصريين بيميلوا للعربيات السيدان عن الهاتشباك .. لكن ده مش مقياس يعنى ..


اما موضوع القسط للاسف مش هعرف افيدك فيه لكن باذن الله الاعضاء هنا هيفيدوك فيه افادة كاملة ...


وربنا يوفقك يا باشا وتفرح بالعربية الجديدة فى اسرع وقت ...

تحياتى ونورت المنتدى ....