[miam0502788391]

حوادث الطريق الساحلى
المسافة من الاسكندرية لمطروح حوالى 300 كيلو ومن العلمين لمطروح حوالى 200 كيلو وكان معظم مرتادى الطريق الساحلى اللى بيصيفوا فى مطروح فئتين
فئة جايه عن طريق الاسكندرية ودول اللى جايين من الاسكندريه نفسها اوهيفوت على الأسكندرية يعنى جاى عن طريق مصر اسكندرية الصحراوى او جاى من محافظات الوجه البحرى
الفئة الثانية ودول جايين عن طريق القاهرة - وادى النطرون - العلمين ويكمل بعد كده على مطروح
ولأن الضبعة كانت فى المنتصف تقريبا بين الأسكندرية ومطروح فكانت ملتقى لاستقبال حوادث الطرق يعنى اللى مسافر مطروح وعمل حادثة بعد العلمين اقرب مستشفى له الضبعة والعكس اللى راجع من مطروح اقرب مسشتفى له الضبعة
كان معدل الحوادث كتيير فى الصيف خصوصا مع ساعات الصبح المبكرة وكان لا يفوت اسبوع الا لما يحصل على الأقل 3 حوادث والاصابات متنوعة من خدوش ورضوض بسيطة الى الوفاة لا قدر الله

اهم ملاحظة لاحظتها على حوادث الطريق الساحلى فى الصيف ان كان معظمها (ان لم يكن كلها) حوادث سيارات ملاكى لمصطافين مش متعودين على الطريق يعنى نادرا لما كان ييجى حادثة سببها ميكروباس او عربية بيجو اجرة , ولما تسافر على الطريق تعرف السبب
الطريق الساحلى واسع وممتد وتبقى كاشف مسافة كافية جدا امامك (عدة كيلو مترات) وده كان يغرى كتير من المصطافين بزيادة السرعة بطريقة غير مدروسة لملفات الطريق او الاماكن السيئة منه وفى الصباح كان فى الغالب تلاقى شبورة فده يزود معدل الحوادث
الاخوة سواقين الاجرة والميكروباس كانوا حافظين الطريق وعارفينه حته حته فلا يغتروا بيه حتى لو زود السرعة يبقى بصورة مدروسة
اذكر فى مرة سيارة مرسيدس عيون انقلبت وتوفى راكب وتم ادخاله المشرحة لحين تصريح الدفن ييجى من النيابة وأهل المتوفى يستلموه , كل شوية عربية من اقارب المتوفى تيجى المستشفى مرة عربية مرسيدس عيون مرة جيب جراند شيروكى واقل عربية كانت الباسات يعنى دى كانت العربية الشعبية عندهم
وقانا الله وايكم شر الطريق وأذكركم واذكر نفسى بدعاء السفر قبل التحرك بالسيارة