[Injection]

هيا بنا نلعب

مبدأيا لكل الرجالة اللى بتستفسر عن الجنوط, المشكلة الوحيدة اللأساسية فى تغيير الجنوط أنك لو جبت جنط أكبر من الأصلى فى القطر, عداد السرعة هيهيس ومش هيقرأ السرعة صح, علشان كده بتجيب جنط قطره الكلى (يعنى قطر الجنط بالكاوتش) نفس قطر الجنط والكاوتش القديم.

بمعنى لو بصيت على الجنط بتاعك, ولنفترض أنه 13, هتلاقى الكاوتش لوحده أرتفاعه عن الجنط عالى, أنت بتحاول تجيب جنط يركب عليه كاوتش يبقوا الأثنين فى حدود الأرتفاع القديم للعجلة (الجنط والكاوتش).

وغير القطر, مساحة سطح الأطار بتأثر على أحساسك بالطريق, يعنى الجنط الأكبر هيبقى الكاوتش بتاعه ملامس للأرض أكثر, وهيحسسك بالطريق وتفاصيله أكثر وخاصة أن أرتفاع الكاوتش (البروفايل بتاعه) قل عن الأول, وده بينقل تفاصيل الطريق أكثر.

ممكن تعلى مقاس أو مقاسين عن الجنط الأصلى, أكثر من كده غير مرحب بيه علشان مع أى حفرة الجنط ممكن يتكسر بسبب أرتفاع الكاوتش القليل, وطبعا الطرق عندنا زبالة وهتبقى قاعد فى خلاط لو المقاس كبير زيادة عن اللزوم.

يعنى من الأخر مع تكبير الجنوط أرتفاع الكاوتش الراكب عليه بيقل, علشان يكون ككل زى حجم العجلة الأصلية بالظبط.

اللى عايز يجرب, ده موقع بيحسب قطر الأطار القديم ويقارنه بقطر الأطار الجديد اللى أنت هتديهوله, وبالشكل كمان, وشوية حبشتكانات تانية.

http://www.kouki.co.uk/utilities/vis...ize-calculator

المشاركة الأصلية كتبت بواسطة drift انا عندي عربية جيلي mk الجنوط والكاوتش الي فيها 60\185\ جنوط 15 ياتري اعرف اركب عليها جنوط وكاوتش 50\195 جنوط 16 ولا مش ينفع وياتري اية انسب كاوتش عريض ممكن يتركب عليها وجنووط

بـأستخدام الموقع أعلاه

ينفع ياباشا, بس هيبقى فى فرق 0.3% عن سرعة العربية الأصلية فى العداد, وده فرق صغير جدا مافيش منه مشكلة.

بالنسبة للعرض ياباشا فأنت ممكن تزوده مع تقليل البروفايل بتاع الجنط أو تصغير حجم الجنط نفسه, فاممكن تركب عليه حتى 220/45/16

وممكن جنط 17, هيبقى 215/40/17, أوجنط 18 كالتالى 210/35/18

بتزود حاجة وتقلل حاجة.

والموقع موجود لو حضراتكوا تحبوا تجربوا, هتدخلوا المقاسات القديمة والمقاسات الجديدة وهو هيحسب كل حاجة, والفرق فى القطر وقراءة السرعة هيبقى مكتوب تحت صورة الأطار, الموقع هيفيدكوا أكثر منى.

أهم حاجة أن قراءة عداد السرعة متتأثرش كتير عن الأول, والموقع بيحسبلك الفرق بين الجديد والقديم, حاول ماتزودش عن 1% علشان الفرق فى السرعة يبقى غير ملحوظ.

ولو حد عنده صعوبة فى أستخدام الموقع, يقولى مقاس الأطارات بتاعته و أنا أحسبله اللى ينفع يركب, وأنا قلت الكلام الكتير اللى فوق ده علشان محدش أدانى مقاس الكاوتش بتاعه غير الراجل الطيب ده, اللى معاه المقاس يتفضل.

المشاركة الأصلية كتبت بواسطة NOUR2019 صباح الفل يا رجاله .. عندي كام استفسار كده ... انا معايا 131 متضبطه شغل ادام و ورا و اكصدامات متغيره و شبوره و زينون و هوايات مفتوحه عموله في الجناب و الكبوت و جنوط 15 بس صاحبها كان مهبطها من ورا عن طريق قص السوست و ده خلا العفشه قاسيه اوي و بترزع معايا في المطبات .. ايه حل نشفان العفشه مع الجنط ال 15 ومراعاة تهبيط العربيه بما يتناسب مع المنظر العام .. و سؤال تاني معلش ... مين في القاهره بيعمل شبكه بوش الفوانيس عموله بس حاجه عاليه صح عشان شبكتها اتدغدغت و متبهدل في اللجان و الف شكر مقدماً يا شباب و ارجو منكم سرعة الرد لاني مخنوق جدا و مش عارف اعمل ايه

بص ياباشا, قص السوست أصلا غلط, وبيتعب بعد كده.

السوست بتتقص علشان تهبط العربية وتخليها ثابتة أكثر, وبتضحى بالراحة فى المقابل, وللأسف طالما السوست أتقصت يبقى لازم تجيب سوست جديدة لو عايز الراحة, بس ده هيعلى العربية عن الأول ويقلل من ثابتها.

فى سبيل الشكل والثبات بتضحى بالراحة, وفى سبيل الراحة بتضحى بالشكل والأداء.

الحلول اللى قدامك كالتالى, ياترجع السوست لأصلها بأنك تشترى سوست جديدة, وبكده تبقى رجعت العربية لحالتها الأصلية, ياتسيبها زى ماهى كده وتضحى بالراحة.

ممكن الصوت اللى بتسمعه يبقى جاى من أن المساعد مع المطبات بيتضغط لأخره فابيخبط, ممكن تجرب تركب صدادات عند عفشجى ممكن تحل المشكلة وهتخلى العربية تنزل لحد معين فقط, بس خلى بالك هتنشف العفشة أكثر.

وممكن تبقى تاخد المطبات بالورب علشان العربية مترزعش

بالنسبة لموضوع الصب, للأسف معرفش حد, أعذرنى.

وربنا يباركلك فيها, ومتزعلش أنت معاك عربية ممتازة, شدة وهتعدى.