[Injection]

بص ياباشا, أزالة الخدوش هى عملية أصلاحية بيدخل فيها عدة مكونات, الخدوش لازم تعرف مبدأيا أنها مش هتتشال, حضرتك بتحاول تخفيها فقط وتلونها بلون الدهان وتخليها غير ملحوظة قد ماتقدر, وأحيانا الطريقة بتنجح نجاح باهر مع ناس, وبتخيب مع ناس تانية,

البوليش زى ما أسمه بيقول هو ورنيش, مكون أبيض بيتوزع على العربية وبتتددعك بيه كويس جدا, وخاصة على أماكن الخدوش, وبيساعد على اخفائها وتلوينها بلون العربية.

أما الواكس فهو شمع, بتتدعك بيه العربية بعد ماتخلص البوليش, علشان يديها لمعة كويسة, ويساعد على أخفاء الخدوش أكثر, ويحمى الدهان بعد كده.

البوليش أشهر نوع ليه أسمه ميدو, وده العلبة ب 4 جنيه ولونه أبيض وموجود عند محلات الحدائد بكثرة.

الواكس ليه أنواع كتير وأسعار مختلفة, وفيه اللى بيدعى أنه بيزيل الخدوش واللى ملون بلون العربية, واللى بيحمى الدهان بعد كده, واللى بيدى العربية لمعة بتقعد شهور, كل نوع وليه مميزات, بس أنا ماليش فى سوق الواكس.

الموضوع ممكن حضرتك تعمله بنفسك زى المواضيع المثبتة, بس نصيحة منى بلاش, هتتعب لدرجة أنك مش هتقدر تقف ولا تتحرك اليوم اللى بعده, وهياخد الموضوع قرب اليوم كاملا.

وأنا ليه تجربة سيئة مع البوليش أنتهت بالبهدلة وبغسيل العربية فى البنزينة لأزالة البوليش من عليها

فحضرتك ممكن تاخد المستلزمات لسمكرى عنده صاروخ للتلميع (اللى عليه قماشة وبيلف بسرعة) وهو هيخلصها فى نص ساعة وهيخليها عروسة, وفيه بنزينات برضه فيها المكنة دى, وتبقى ريحت دماغك وخليت العربية بتلمع.