[Injection]

موضوع رائع ياباشا, الفرق بيننا وبين معظم الدول المتقدمة أن هما بيعاملوا مواطنيهم كبنى أدمين مش بهائم, وكل واحد بيعمل اللى عليه ويؤدى واجبه بأمانة, طبعه كده, وهيتجازى لو عمل العكس, أنما عندنا, الله أكبر ماشاء الله الريس مش بعيد يعيش أكثر من ملكة بريطانيا.

وأنا معجب بمصر بحالتها الحالية, لأن كل اللى بيشتكى منها بيعمل حاجات غلط فيها, سواء لأختصار الوقت زى الركنة فى الممنوع والسير عكس الطريق, الغرز والسير بسرعة عالية, عدم دفع المخالفات بالتظلم, أبجنى تجدنى, زبالة فى الشارع وهكذا, كلنا أستفدنا بصورة أو بأخرى من البلد وحالتها.

أستاذ مهران, الشعب فعلا بايظ فى أخلاقه وفهمه للحقوق والواجبات, بس عايز أيه من شعب الأنتخابات بتتزور قدامه, الريس بقاله أكثر من ربع قرن وشكلنا هنحلتفل باليوبيل الذهبى بتاعه, مجلس الشعب الأعضاء الكبار عملوا فيه أبونيه وولا هاممهم الشعب ولا نيلة, وكبيرالمواطن يقرأ مقال يشجب الموضوع فى جريدة.

الحكومة غلطانة برضه, لما العدل مايتطبقش وتشوف ظابط مفيم وسرينة وشايل اللوح, وأنت تدفع مخالفة علشان السبحة اللى متعلقة فى المراية هتحس بأيه, هتحس بأيه لما عضو فى المجلس المنيل أو وزير عنده بدل الفيلا 2 وبدل العربية 3يقعد حاطط رجل على رجل يقول 400 جنيه كفاية والمواطن يقدر يعيش بيها, ده أنا مصروفى لوحده أكثر من 600 جنيه بمرتب التدريب ومش عارف أنيل حاجة, ده غير كلام تانى كبير فى السياسة والتعليم و و و مكانه مش هنا.

الشعب عمره مكان أستغلالى وحرامى ومتخلف, عمرك ماكنت تشوف حد جايب دى جى ومصحى المنطقة كلها علشان فرح, أو موقف أحوال الناس فى الطريق علشان يقولهم أن أتجوزت, أو بهيم مكسل يرمى الزبالة فى الصندوق اللى الناصية التانية فيرميها فى نص الشارع, ده أنا مرة واقف فى البلكونة لقيت شنطة زبالة نازلة من فوق ودببببب فى نص الشارع الساعة 4 الفجر, اللى حصل للشعب نتاج عمل الحكومة, فقر وفقدان للقيم والأخلاق وتعليم لا يصلح للبهايم, كتاب العربي بقاله حوالى 20 سنة هو هو, ده كلام ياناس.

وحاجة تانية معلش, أنا نفسى أتصل بالشرطة وأقولهم فيه واحد متخلف بيرمى الزبالة فى الشارع, أو صاحب العمارة ال @#$%%@ جاى يدبح فى المدخل ويبهدل الدنيا علشان يتمنظر ولأنه ميقدرش يعمل كده فى بيته اللى فى مدينة نصر, أو أقولهم فى واحد حيوان فى موسم التزاوج واقف على الناصية وعمال يعاكس, أو فى خناقة بالأسلحة فى الشارع أو أو, تفتكر حضرتك الشرطة هترد تقول أيه, وهل حتى لو ردوا رد أيجابي وبعتوا حد هييجى أسرع من أسرع ديليفرى فى مصر, ولا هتستنى 4 ساعات على ماتلاقيه؟

على العموم أنا من المعجبين جدا ببريطانيا وتاريخها وكل حاجة فيها, وخاصة أن جنبك الأتحاد الأوروبى كله تتجول فيه بمزاجك, ده عندنا الواحد بيبقى هيطير لو قدر يطلع يحج, بلد رائعة الجمال.

ربنا يرزقنا وأياكم جميعا بالجنسية, سواء المصرية أو البريطانية.

وأنا أسف على الأطالة, بس فرصة الواحد يفضفض شوية.