سافرت مدة للندن ثم رجعت لمصر في رحلة عمل... وياريتني ما سافرت ..لإني وجدت أن المواطن المصري المطحون عادة يرضى بحاله لأنه لم يشاهد كيف يعيش الناس بالخارج وتعاملهم حكوماتهم كآدميين.. فإذا ما جرب السفر مدة ثم عاد لبلده تعجب أيما عجب ولسان حاله يقول: (هل صحيح كنت أعيش في بداية حياتي متحملا تلك الظروف والمعاملة المهينة ؟).. أيها المواطن المصري.. ارحل.. سيمكنك شراء مرسيدس أو بي إم فئة سابعة مستعملة بحالة رائعة أختها في مصر لا تقل عن نصف مليون (مستعمل) تشتريها بما يوازي 30 ألف جنيه..ومش بس كده دانتا تقدر تصرف عليها وتظبطها وتشتريلها أي قطع غيار محتاجاها ، وإن كان حالك على القد يمكنك شراء صني أو كورولا موديل تسعينات بما يوازي عشرة آلاف فقط أي أقل من فيات127 موديل تمانينات في مصر.. عندما ترغب في تجديدالليصنس (الرخصة).. ادفع قيمة التجديد والتأمين المطلوب عن طريق الانترنت ثم اذهب لأقرب مركز مروري واستلم الاستمارة الجديدة بدون واسطة في 5 دقائق.. ضابط المرور يأتي إليك إن أخطأت ويبلغك بأن عليك مخالفة وهو يبتسم معك كأخ لك.. فكونك أخطأت لا يعني أنك مجرم.. وكونه يتعامل معك بأدب لا يعني أن يجاملك فهو فقط يؤدي وظيفته.. الطرق نظيفة ومقسمة عدة حارات وكل سيارة ملتزمة بحارتها فإن أراد أحدهم تجاوزك قلب لك النور العالي فتعطي إشارة يمين بهدوء لتفسح له بدون أن يحاول أن يأخذ غرزة من أمامك قد تؤدي لكارثة (كما يحدث معنا على الدائري وصلاح سالم وجسر السويس وغيره حيث تفاجأ بجنون السائقين على العديد من الطرق المصرية).. أماكن الانتظار المجانية أو بأجر رسمي معقول يتم حسابه بصورة إلكترونية منتشرة في كل مكان ولا يوجد من (يغلس) عليك من الذين حولوا أرصفة الشوارع العادية كأماكن باركينج عشوائية بأسلوب بلطجي..أو من شركات النصب اللي اشترت الحارة اللي جنب الرصيف في معظم شوارع وسط البلد وتلاقيك اشتريت كارت ب 27 جنيه عشان كل اللي أنا عاوزه أركن ربع ساعة فقط أروح أمضي ورقة معفنة من التأمينات الاجتماعية في شارع الألفي.. أو أمين شرطة غلس يوقفك عشان الزجاج فاميه مع انه فاميه 0.05 خمسة في المية يعني ميبانش الا للغلسين أوي أوي أوي وانا أصلا مركبه عشان عزل الحرارة وفعلا بيفرق ويريح كومبرسور التكييف يفصل كتير ويقلل استهلاك البنزين ويقلل الحمل عالموتور، بره وفي الخليج الحكومات بتوصي بيه عشان يكون في خصوصية للعائلات اللي راكبين سياراتهم بشرط انه التفييم يكون لحدود معينة(نسب معينة تسمح بالرؤية السليمة) والبربريز الأمامي ميتفيمش......
ياجماعة اللي يعرف يخلع...... يخلع ، واللي عايز يستنى هنا ......ههههه.....يستنى... يبقى قابلني ان فلحت والحمد لله الحكومة بتساعدك عالفلاح، ومن سبل ذلك:
1-فاتورة الكهربا شوف الزيادة اللي حصلت فيها بداية من هذا الشهر أو اللي بعده
2-فاتورة الغاز زودوا ايجار العداد 50% بدون الرجوع للمواطن(وهو الطرف التاني في العقد) وبدون وجه حق أو خدمة زيادة أوتحسين للخدمة الحالية (50% في حد ذاتها تعتبر كارثة)
3-فاتورة الميه- تقديرات جزافية- العداد جديد لكن النظام بتاعهم ان احنا ملناش دعوة بالقرايات- طيب ليه أجبروني أشتري عداد (ملحوظة: العداد تمنه 1500 جنيه)-يعني مثلا استهلكت الشهر ده 62 متر مكعب ميه-تمنهم(متر=0.5جنيه)يعني حوالي 30جنيه- الفاتورة جية ب 620 جنيه(ميه300،صرف280،افشخنا ت ورسوم جباية40)
4-فاتورة التليفون اللي كنت بتدفعها كل 6 شهور بقيت بتدفعها هي نفسها ويمكن أكتر كل 3 شهور
5-الضريبة العقارية(الغير دستورية)متفرحشي ياحبيبي-لوانت النهارده معفي فانت بكره مش معفي-ولو النهارده 50 جنيه(مقدور عليها)بكرة هتبقى بكام؟؟؟؟(هل هتقدر عليها)
6-الزبالة الإجبارية كانت ب3جنيه تضاف على فاتورة الكهربا لكل شقة- والناس اتظلمت وعملوا قضية وكسبوها والمحكمة حكمت بعدم مشروعيتها- إيه النتيجة؟؟ فين أم القضاء؟؟؟- عقابا للناس الوحشين المش كويسين بقت ب 8 جنيه- حد يقدر يتكلم؟؟؟ حد يقدر يعمل قضية تاني؟؟؟ وشوارع القاهرة بقت كلها مقالب زبالة
7-وثيقة الصحة بتاعة -استغفر الله العظيم يا رب- اللي بيفكر يتجوز- زادت
800%- اه والله بجد- بدل 10 جنيه-بقت 80 جنيه للعريس وزيهم للعروسة- عشان تاخد ورقة معفنة تفيد بأن المذكور لائق طبيا-هههه-بدون لا كشوفات ولا يحزنون-يوم طويل في طابور مهين-عشان تدفع الجباية 160جنيه-وتاخد على قفاك وتمشى- بصراحة أخوي كتر خيره هوا اللي راح المشوار ده
11-التأمين الصحي الإجباري-اللي لسة طالع اول امبارح-60جنيه شهريا للأسرة-يعني
720 جنيه سنويا-بصراحة مش لاقي غير ×××- مع الإعتذار للي فهمني(××× جملة اعتراضية توضيحية تفيد الشجب والاستنكار وهي شائعة بين جموع الشعب)
متهيألي كفاية كده ، عشان لو زودت ممكن يحصلنا حاجة-هههه-
وربنا يسامح اللي كان السبب في اللي احنا وصلناله - يوم ما مسكها كان الجنيه ب 5 دولار- النهارده الدولار ب 5 جنيه بل بأكتر من هذا- مع إن لافي حروب ولاكوارث ولا بتاع !!!!
وربنا يسترها علينا جميعا