[AbOnOrA]

بالظبط يا سامح الله ينور عليك

طبيعة الشخصية من العوامل لكن عمرها ماكانت عامل اساسى او مؤثر بشكل مباشر على الاختيار هى بتبقى ليها دور بالاضافة لحاجات تانية

انا مثلا كنت بفاضل بين ( لادا 2017 ولادا كالينا - وفيرنا ولانوس )
احتياجاتى واستخدامى كان محتاج له عربية عملية لاقصى الحدود ومش مكلفة فى صيانة او قطع غيار ومكونش محتاج للتوكيل ايا كان فكنت ميال جدا للادا بس الكالينا كانت لسه جديدة ومش معروف هنتشر ولا لاء فخفت منها والادا 2107 كانت حاسس انى هبقى اشتريت عدة (مفك - شاكوش ) بس مش عربية عدة جامدة ومنجزة اه بس مش هحس بمتعة العربية (وجه نظر شخصية) فبالتالى مكنتش هبقى مبسوط بيها اوى بس كنت هشتريها فعلا

وكنت شايف ان الفرق فى الفيرنا والانوس كتير والشاهين سعرها مبالغ فيه جدا فكنت اميل اقتصاديا للادا برضو
بس لما روحت اقارن فى معرض الامل بين المصرى والروسى لقيت البرايد ولقيت انها حققت توازن افضل للمعادلة بين السعر وتكاليف التشغيل والتطور فكان قرارى بانى اشتريها بعد دراسة اكتر من شهرين وبحث فى على الانترنت وفى كل حتة ده بالاضافة لانى مالك للنسخة الكورى منها

مثال تانى البرايد الكورى قبل ما نجيبها كان معانا دوجان واول مشتريناها مكنتش قابلها خالص وكنت مستغرب ان والدى يجيب عربية زى ديه وبالحجم ده اصلاً وهو بيحب الايطالى والعربيات القوية والدوجان كانت جميلة بصراحة اول مانزلت والبرايد كانت حاجة كده زى الصينى اول ما نزل والناس كانت مستغرباها ومستقلاها جدا وكانت ارخص عربيات فى مصر

بس بالاستخدام والعشرة (زى ما بيقولوا) حبيتها واقتنعت بيها جداً

فالشاهد ان التفضيل بناء على الصفات الشخصية له دور فى الاختيار لكن مش كل حاجة