[mercedes]

السلام عليكم و رحمة الله و بركاته

اللى أنا أعرفه , أن البياع بيديك العربية نظيفة , بمعنى , أنه المفروض يديك العربية ماعليهاش أى غرامات و لا مخالفات و عشان كده اللى بيشترى عربية مستعملة , بيشترط على البياع أنه يجيب له شهادة مخالفات حديثة تثبت أن العربية ماعاليهاش أى مخالفات حتى تاريخ انتقال الملكية من البائع للمشترى و هنا على فكرة فيه لعبة ممكن البائع يعملها لو هو ليه حد فى نيابة المرور , أنه يرحل المخالفات , يعنى يطلعلك أنت شهادة نظيفة , يدوب لحد ما البيعة تمشى و بعد كده , تروح أنت فى أول تجديد ترخيص , تلاقى العربية عليها مخالفات من تاريخ قبل الشراء و لدلك :

يفضل أنك لما تستلم شهادة المخالفات من البياع , أنك تصورها و أنك لما تشترى العربية و هتبقى مبلغ من المال للبياع لحد مايجيبلك شهادة مخالفات , أنك تسأل على المخالفات بتاع العربية بنفسك و دى مش بتحتاج الا صورة الرخصة و صورة البطاقة بتاع صاحب العربية و لو روحت و لقيت عليها مخالفات , المفروض البياع اللى بيدفعها لأنه لازم يديك العربية نظيفة و لما البياع يجيلك و يديك شهادة المخالفات النظيفة , لازم يديك معاها الوصل اللى دفع بيه المخالفات و طبعا لو قاللك أن العربية ماكانشى عليها مخالفات , يبقى بيكدب عليه و ساعتها , أنت قولله , لأ يا حلو الملامح يابو رمش جارح, العربية كان عليها مخالفة كدا يوم كدا و بكدا و لو لابط معاك و مارضاش يدفعها و أنكر , اخصم الغرامة دى من الفلوس اللى باقية للبياع .

بالنسبة لمصاريف نقل الملكية و التسجيل فى الشهر العقارى, بتبقى على المشترى .

بالنسبة لمصاريف الترخيص , لو الرخصة منتهية و هيتدفعلها مبلغ , جزء منه بيغطى الفترة اللى فيها العربية كانت مع البياع , بتبقى على البياع لحد تاريخ البيع و الفترة اللى من أولها هتبقى مع المشترى بتبقى على حساب المشترى , يعنى :

عربية مثلا رخصتها هتخلص فى 13-5-2010 و صاحبها ماجددهاش و باعها فى 10-11-2011 , يبقى مصاريف الترخيص لحد 11-11-2011 على البياع و مابعد دلك على المشترى , لأنه هو اللى هيستخدم العربية بعد 11-11-2011 , يعنى التجديد من 13-5-2010لحد 13-5-2011 على البياع و من 13-5-2011 لحد 11-11-2011 على البياع برضه , لكن من 11-11-2011 و أنت طالع , على المشترى لأنه هو اللى هيستخدم العربية و يمشى بيها و ينتفع بيها بعد كده.

شكرا و آسف للاطالة .

MERCEDES S320