[miam0502788391]

موقف لا أحسد عليه
مرة وانا نوتبجى استقبال فى مستشفى الضبعة وقاعد حوالى الساعة 3 بعد الظهر بحجرة الكشف , فجاة دخل طرقة الاستقبال راجلين بدويين ومعاهم 2 ستات
الاربعة دخلوا على طول من غير إحم ولا دستور على حجرة حجز المرضى الملحقة بغرفة الكشف ( المفروض ان العيان بيدخل يكشف الأول وبعدين لو طبيب الاستقبال شاف انه محتاج يتحجز فى القسم الداخلى يدخله لاستكمال العلاج)
الأربعة دول دخلوا على طول والحق يا دكتور الحق يا دكتور حالة عندها نزيف
طبعا قمت جرى اشوف فيه ايه
اول ملاحظة لاحظتها انى اول مادخلت اشوف الحالة احدى السيدتين قامت باخراج الرجلين البدويين واغقلت الباب وتوجهت لى بالرجاء قائلة استر عليها يا دكتور الله يخليك دى بنت
طبعا انا مفهمتش حاجة لكن انا مشيت فى اجراءات الكشف وقلت لها ورينى بتشتكى من ايه
ووجدت المصيبة
الآنسة اللى كان عندها نزيف وبتتوجع مكنش نزيف ولا حاجة دى كانت آلام مخاض و الهانم كانت تحمل سفاحا والراجلين البدوين اللى بره ورا الباب فاكرين ان عندها نزيف من بواسير
طيب اعمل ايه فى البلوة دى الست اللى مع البنت عمالة تترجانى ان استر على البنت ومفضحهاش , طيب والأتنين اللى واقفين بره دول لو شموا خبر بكده ممكن يهدوا المستشفى ولأنى كنت لسة دكتور جديد فكان لازم استدعى الدكتور اخصائى النساء والولادة , طيب لو دكتور النسا جه طبعا الراجلين اللى واقفين بره دول لازم هيشكوا فى حاجة خصوصا ان دكتور النسا كان معروف فى البلد
المهم تماسكت وقلت يا واد اتوكل على الله كان معايا طبعا ممرضة وقمت ولدت البنت ولفينا الجنين فى ملاية وقعدت جنبهم
اعمل ايه ؟ اعمل ايه ؟
باب الغرفة اللى كنت فيها كان فيها شباك قريب من بوابة المستشفى قمت ناديت على الموظف اللى كان قاعد على البوابة وكان اسمه رفيق على ما اذكر
رفيق رفيق
فجاء عند الشباك
فيه ايه يا دكتور محمد ؟
اتصل بمدير المستشفى ييجى ضرورى
فيه ايه؟
اتصل بيه بس قله ان فى حالة حمل غير شرعى فى المستشفى
غاب شوية ورجعلى
المدير مش هييجى
نعم يا خويا
بيقول بلغوا البوليس وهو مش جاى
طيب بلغ يا خويا
كل ده والغرفة مغلقة علينا انا والممرضة والبنت والست اللى معاها والراجلين واقفين بره وحاسين ان فيه حاجة غريبة بتحصل
بعد شوية جه ظابط البوليس طبعا دخل وقفلنا الحجرة من غير ما حد تانى يدخل
فيه ايه يا دكتور
انا : الطفل ده مش عارفين ابوه مين
المهم الظابط قعد يقررفى البنت انه يعرف مين ابوه والبنت ابدا مش عايزه تقول ( خايفه عليه) وفين وفين على ما الظابط طمنها وقال لها انه مش هيعمل فى ابو الولد حاجة قامت قالت على اسمه
علشان الموضوع يفضل فى طى الكتمان دخلنا عاملة من المستشفى واخدت الولد فى حضنها على انه ابنها ومريض وجاى يتعالج وقعدناها على سير بعيد
وفتحنا الباب
ودخل الراجلين اللى كانوا بره وفهموا ان الظابط كان داخل علشان العاملة مش علشان بنتهم
وقعدوا جنب البنت يطنوا عليها وهما لسه فاهمين ان الحالة نزيف من بواسير
بعد شوية المستشفى كلها تقريبا عرفت بأمر البنت ماعدا الراجلين طبعا
وبالليل كان فيه سائق اسعاف فى المستشفى من البلد عرف بالموضوع قام على طوووول رايح قايل للراجلين واخوها ان بنتكم عملت كذا وكذا
البنت من ساعة ما اهلها عرفوا بأمرها قاطعوها ومفيش اى حد اتى لزيارتها فى المستشفى
تكلمة القصة البوليس قعد يقرر فى البنت لحد ما عرف ابو الجنين مين وطلع عامل صعيدى كان شغال مع البنت فى جمع التين والبنت حملت منه سفاحا ولأن لباس البدوا واااااسع وفضفاض فعلامات الحمل لم تكن واضحة عليها لحد ما اتاها ميعاد الولاده
المهم البوليس قفش العامل ابو الولد وخلاه عقد قرانه على البنت فى قسم الشرطة واستدعى كبير العيلة بتاع البنت واخد عليه تعهد انه يوصل البنت وابنها وجوزها سالمين الى الصعيد لكن كبيير العيلة قال للشرطه ان يضمن يوصلهم بس لحد الأسكندرية من غير ما حد من البدو يتعرض لهم
وجه العامل واخذ زوجته اللى كانت لسه محجوزة فى المستشفى ورافقهم كبير العيلة بتاع البنت وركبوا المكيروباس وسافروا