[سيف الدين سعيد]

المشاركة الأصلية كتبت بواسطة alaa moh يا استاذ سيف . مبروك اولا على السيارة الجديدة ( ربنا يبارك لك فيها ) لاكن اكيد اخيتارك للل جاك هاخدو فى حساباتى . لاكن ممكن تعرفنى هي سعرها ( جاك ) كام و من اى مكان .

يا أستاذ علاء : الله يبارك فى حضرتك . ومتشكر ليك جدا .
وطبعا الجاك أخدت منى وقت طويل من التفكير لغاية ما أخدت قرارى بشراها . وللأسف كان دا بتمنه لأنها اول ما نزلت كانت ب 69900 ودلوقتى سعرها زاد ووصلت 78900 . وطبعا الحسابات والسؤال على العربيه دا بيكون عامل مهم جدا لأنك بالخبره بتدور على كل جوانب العربيه اللى المفترض انها حاتعيش معاك لفتره طالت او قصرت انما لازم تريحك.
طبعا جودة العربيه ومكوناتها . وخاصة الأساسيات دا عامل مهم . الجاك موتور وفتيس وعفشه ميتسوبيشى لانسر مما يعنى ان قطغ غيارها الميكانيكيه حاتكون متوفره لفتره معقوله ( ميتسوبيشى ) . وبعدين جودة التقفيل وطبعا التشطيب . وكمان الصاج بتاعها تقيل ودا اكيد راجع لأنهم بيشتغلوا فى معدات النقل الثقيل .
ونيجى للأوبشنات فنلاقى ان فيها اوبشنات عاليه جدا ومتناسبه اوى مع السعر المنافس اللى هى حتى حاليا متوفره بيه . كمان وسع الصالون والشنطه حاجه مهوله جدا ويمكن مش متاحه فى عربيات كتير من الماركات المعروفه .
كل دى عوامل حطيتها فى حسابى فى الأول بس فى عامل تانى أهم وهو عامل التوكيل ومراكز الخدمه ودى اتعرفت عليها من هنا من خلال أخواننا المالكين للسياره واللى جربوها وتعاملوا مع مركز الخدمه . وكلهم والحمدلله قالوا كلام كويس عن الخدمه والصيانه .
وبالنسبه ليا انا فانا اشتريت العربيه من معرض الشركه فى شارع البطل احمد عبد العزيز فى المهندسين . ولو احتجت منى اى خدمه انا تحت امرك .