[خالدخليفة]

مقال (2)
اللـــــــــحــمــة

اللحمة بـــ 65 جنيه وأيام الاعدادى كانت ب68 قرش
والواحد كان بياكل فيها لحد م يطلع له كرش
والنهاردة مفيش لحمة وسمعنا عن لحمة ب45 جنيه
بس عايزة وقفة من اول النهار يابيه
وتقوم خالتك أم حسام صباحا الساعة 8
وكأنها رايحة مشوار الى المانيا
وتقف فى الطابور
وحتى تلحق مكانا متقدما فى الدور
وهااااااااااااات يارغى من كل شكل ولون
ولأن المصريين شاطرين
تلاقى واحد واقف جنب الطابور بترابيزة عليها ساندوتشين
وجنب منه عمك حسين جايب بوتاجاز وبيبيع شاى للواقفين
ومفيش مانع من جوز نشالين جوه الطابور رايحين جايين
وبعد 3 ساعات من الوقفة
اخيرا جات اللحمة
وتحول الطابور الهادىء الى سوق الجمعه
فهذا ينادى محمد وهذه تنادى جمعة
يافلان ياعلان
وتحول اصدقاء الطابور الى اعدقاء (اعداء واصدقاء )
واختلط الحابل بالنابل
وعمك سنوسى الجزار
ولا فى دماغه كل هذا الشرار
فهو مشغول بتشفية اللحمة
ثم تقسيمها الى اصحاب الحظوة والمحاسيب الذين لايطيقون الزحمة
ثم يبدأ فى بيع ما تبقى
واخيرا حصلت أم حسام على كيلو ونص لحمة
وتذهب الى البيت مزهوة
فقد فازت باللحمة بلا اى قوة
ولكنها نظرت فى الساعة
يانهار ابيض ياجماعة
الوقت راح والساعة
بقت 2 الضهر
ومش هلحق اطبخ للراجل
ولو استعنت بسرعة الحمام الزاجل
ودخل عمك أبو حسام
جاى من الشغل جعان وتعبان
فين الغدا يا ام حسام
فاضل ساعتين بالتمام
مذهولا على هذا الكلام
ساعتين ليه
كنتى فين يا ام البـيـه
كنت فى الطابور
بجيب لحمة ولما جه الدور
كان الوقت راح
والدنيا بقت سداح مداح
وكظم ابو حسام غيظه
وعصر على نفسه لمونة
واشترى علبة تونة
ولعن ابو الدنيا الملعونة
اللى وقعته فى هذه الزوجة المجنونة
والتى اضاعت نصف النهار
فى كيلو لحمة لكى تغيظ فرج الجزار
ولكن اللى اتغاظ واحد تانى وانهار
رحمة الله عليك ياسادات
منعت اللحمة شهر
علشان سعرها ينزل طول الدهر
وعجبى