رد: أدب الرحلات
مدير مستشفى الضبعة
وده كان مثال للسرقة والفساد فى البلد
مفيش حاجة فيها فلوس بحق او بغير وجه حق الا تلاقى اسمه فيها
مرة حسبنا الفلوس اللى بتقاضاها ( سنة 2000) وجدناها بالمرتب حوالى 8000 جنيه طبعا مبلغ كبير فى وقت طبيب مبتدىء زى حالاتى كان كل اللى بقبضه بالحوافز ( حوافز مطروح كانت 250%) لا يتعدى 400 جنيه
وشوفوا سيادته كان بيشتغل ايه :
- مدير مستشفى الضبعة
- مدير الإدارة الصحية بالضبعة ( لأن مفيش دكتور غيره)
- مفتش صحة الضبعة ( بتاع المواليد والوفيات)
- نوبتجى اخصائى جراحة يوميا بالمستشفى
- نوبتجى على سيارة القلب والعناية المركزة الرابطة بالمستشفى يوميا وكان لايخرح مع السيارة لو فيه حالة حرجة يعنى الأسم عليها وبس وبيقبض فلوس النوبتجيه ومفيش شغل وكان لا يقبل انه يضع اسم دكتور آخر عليها علشان لا يشاركه فى الفلوس
- نوبتجى على سيارة العيادة المتنقلة ( ودى كانت عبارة عن مينى باص بيخرج الى المناطق النائية عليها سواق ودكتور وممرضة للكشف على المرضى الذين لا يستطيعوا الذهاب للمستشفى ) كان سيادته بيكتب نفسه على العربية دى لمدة 15 يوم ودكتور آخر لمدة 15 يوم والدكتور التانى ده هو اللى يخرج على العربية طول الشهر وساعة القبض يقبض 15 يوم بس ومدير المستشفى 15 يوم ( اللى سيادته مشتغلهاش اصلا)
- بدل عيادة : يعنى متفرغ للمستشفى والشغل فممنوع من فتح عيادة خاصة فعلشان كده الحكومة تديله بدل على ذلك ورغم كده كان بيستقبل فى استراحته ( اللى الحكومة اعطتها له) حالات مرضيه ويوقع عليها الكشف وياخد فلوس كشف عادى كأنه فى عيادة خاصة
- وخد عندك دى بقى : كان يجييب بطاقة التأمين الصحى بتاعته وبتاعة زوجته ( زوجته كانت مديرة مدرسة) وبتاعة ابوه وامه كل اسبوع ويضرب عليهم اى روشته ويخلى دكتور التأمين يمضى عليها ويروح يبدل الدواء من الصيدلية اللى التأمين متعاقد معها بزجاجات عطور وشامبو وبودى سبراى وصابون بنفس قيمة الدواء المالية اللى مكتوب فى الروشتة يعنى راجل لا هو عيان ولا حاجة وبيسرق التأمين الصحى
- كان مستغل عربية النقل الدوبل كابينة بتاعة المستشفى فى تنقلاته الخاصة
وما خفى كان اعظم
وعلشان تعرفوا ان المال الحرام مبينفعش وربنا لا يبارك فيه كان له ولد متأخر فى التعليم وبنت معاقه صحيا ومع ذلك ضميره لا يؤنبه فى يوم ويقول له ان ده حرام
الا انه لا يخلو من بعض الصفات الحلوة اللى تدل على اصل طيب
كان فى رمضان لازم يعمل افطار جماعى للأطباء فى منزله وكان يقف يخدم علينا بنفسه وكان يجيد عمل بعض اصناف الحلويات زى الكنافة والعاشورة
وحسبنا الله ونعم الوكيل فى اللى سارقين البلد
__________________
د / محمد
إن الله لا يصلح عمل المفسدين
|