[miam0502788391]

ولا زلنا فى الضبعة
اهل البلد يعتبروا بدو حضر ( يعنى بدو بيسكنوا المدن) وكل الرجالة تقريبا ملتحين يرتدوا الجلباب القصير وتحته بنطلون ابيض ويضعون الغترة(بدون عقال) على رؤوسهم ولا يشذ عن هذه القاعدة الا قلة من الشباب الجديد تلاقيهم بيلسوا القميص والبنطلون (زينا يعنى)
فى الشتاء يلسبون الصدرية فوق الجلباب ودى زى صديرى معمول من قماش العباءات ومطرزة بقطان على شكل رسوم بسيطة , كمان البعض منهم بيضع غطاء للرأس احمر او برتقالى غامق زى اللى بيلبسوه اخوانا الليبيين
الستات كله اسود فى اسود يعنى عباءة سوداء ونقاب اسود بقماش تل خفيف (بضم التاء) وكانو لما يدخلوا حجرة الكشف يكشفوا وجوههن
فى الأول لما شفت الشكل ده انا قلت ان ده ناتج عن التزام دينى ( زى جماعة انصار السنة كده) لكن اتضح ان ده عادة ليس لها علاقة بالدين يعنى هما بيلبسوا كده علشان هما كده واتعودوا على كده
الراجل هناك بتجوز اكتر من واحدة ايوه اكتر من واحدة ( سامعنى يا أحمد بدر) وكنت تلاقى الست التعبانة جاية ومعاها واحدة تتسند عليها ولما اسأل تقولى دى ضرتى , ما شاء الله ايه الترابط الأسرى ده
يعنى انتوا عايشيين مع بعض وأولادكوا مع بعض تقولى ايوه
والراجل ممكن تلاقيه عنده 60 سنة ومراته كبيرة ويتجوز واحدة تانية فى سن أولاده ( واخد بالك يا فى بالى) ومخلف منها اولاد فى عمر احفاده
الحياة هناك تحس ان انت فى غربة كأنك فى بلد غير مصر ولاقيت اهل البلد بيعاملونا على اننا جنسية وهم جنسية اخرى وكل نظرتهم لهذا الوافد الحكومى سواء طبيب او مهندس او مدرس او اى موظف حكومى على انه الحكومة المصرية جابت هنا لخدمتنا
ومع الوقت لقيتهم بيقسموا الناس الى ثلاثة فئات
الفئة الأولى : البدوييين وهم اهل مطروح ودول عندهم من افضل الناس
الفئة الثانية : المصريين ( هما كانوا بيقولوا عليهم كده ) والمصريين دول من الجيزة وانت طالع يعنى القاهرة الكبرى والوجهة البحرى ومدن القناة ولما تستغرب وتسألهم اما انتوا مش مصريين يقولوا احنا بدويين
الفئة الثالثة : أخوانا الصعايدة ومش عارف كانوا بيخلوهم فئة لوحدهم ليه مع انهم مصريين زينا زيهم
ولما تتكلم معاهم ويتبحبحوا فى الكلام تحس ان انتماءهم الى ليبيا مش مصر ولا تستغرب انك تجد ناس منهم متزوجيين ليبيات او ليبيين متزوجيين من بناتهم
لهجتهم صعبة اوى ولا يمكن تفهم حاجة من اتنين بدويين بيتكلموا مع بعض اللهم الا من بعض كلمة هنا او هناك وأول ما ابتديت اكشف على المرضى كنت لا افهم ماذا يقولون فكنت اجيب جنبى ممرضة قديمة فى المستشفى واقول لها ترجمى فاعرف شكوتهم ومع الوقت عرفت بعض كلامهم ومصطلحاتهم لكن طبعا لم اتقن لغتهم خالص
يتبع