[Injection]

هو بعيدا عن أنى مش فاهم أيه اللى هيتحرق, بس أنا شايف أن الجى أم ملائم للسماعات نسبيا, لو واحد أكبر كان هيبقى احسن بكتير طبعا, بس الجى أم ده شغال.

السماعات أنا حاسس أنها تنفع تركب على الكاسيت من غير جى أم خالص وتشتغل كويس, ياريت حضرتك تجربها على الكاسيت قبل تركيب الجى أم وتشوف الصوت.

الجى ام يتضر فى عدة حالات, أكثرها أنتشارا, أنك تركب سماعات أكبر من قوة الجى ام, وتعلى الصوت أكثر من قدرة الجى أم وتسيبه شغال overload على الجى أم يعنى ودى لازم تراعيها فى حالة حضرتك, والحالة التانية أنك تبقى جايب سماعات مقاومتها مختلفة عن الجى أم وتركبها وتشغل من غير مراعاة للموضوع ده, وممكن ساعتها تبوظ السماعات أو الجى أم.

بس فيه حاجة لازم تعرفها, الجى أم مش سهل انه يضرب أو يتحرق, لأنه بيفصل لو أتحط عليه حمل كبير أو سخن زيادة عن اللزوم.

والكاسيت لو كان قصدك عليه مستحيل الجى أم يبوظه لو متركب صح.

الموضوع كله عايز فنى سماعات فاهم (يفضل انك تركب عند مركز مش محل, علشان العامل هناك بيبقى فاهم أكثر وممكن يتجازى على غلطاته) وهو هيحللك الموضوع كله, ولو فيه حاجة ضعيفة هيقولك أيه الاحسن, ولازم تعرف أن أى حد ممكن يركب جى أم وسماعات, المهم يبقى عارف هو بيعمل ايه, وهيحط فيوز قد أيه على سلوك الباور بتاعة الجى أم, وهيركب السماعات بنفس القطبية ولا كله عند البط صابون .

للأسف الصوتيات مش جى ام وسماعات أو صب وركب, الصوتيات علم وفيها شهادات, بصراحة أعيب عليك عدم البحث فى الموضوع كويس قبل الشراء.

وأنا أسف على التأخير فى الرد, انا لسه شايف الموضوع, وبخصوص أن الناس مرديتش فيه ناس مبتبقاش عارفة ومش عايزة تفتى, وناس بتبخل بالمعلومة, ودول ربنا يسامحهم.

وربنا يوفقك.