[mercedes]

السلام عليكم و رحمة الله و بركاته

أنا بس كنت عاوز أوضح نقطة , انا شايف انها هتحل كل الاشكال ده بشكل واضح و سليم .

أنا معرفش البنت دى و لا أعرف مين اللى غلطان , بس اللى أنا شوفته بعينى أن فيه ظابط شرطة بيستخدم طوله و عرضه و سلطته و جبروته و ظلمه اللى الدوله اداتهومله و بيضرب طالبة مصرية عربية مسلمة بكل قسوة و غلظة و شدة على الرغم من أن القانون المصرى لو كان أقر الضرب كوسيلة للعقاب -زى السعودية مثلا- ماكنش هيقر الضرب بهده القسوة , ده اللى أنا شوفته بعينى , ادا فى أى حد تانى كان حاضر الموقف و شاف حاجة تانية , أحنا ماشفناهاش , OK يقولنا , لكن انا مش هكدب عينى عشان أطلع البنت غلطانة أو عشان ألتمس الأعدار للظابط النطع ده عشان أسمحله أنه يضرب البنت دى بهده القسوة , على الرغم أن الشرطة المصرية هى نفسها مابتستخدمش القسوة دى فى التعامل مع البنات اللى -على سبيل المثال- بيتمسكوا فى قضايا الآداب مثلا.

و عشان احنا فى بلد حر و ديمقراطى و لأننا حسنى النية , فأنا هفترض أن فيه هناك حاجات حصلت قبل التصوير و احنا ماشفنهاش و هى أن البنت تعدت على الظابط قولا و فعلا كمان , فالمطلوب أنه بكل بساطة يستخدم القانون لأنه هو رجل قانون فى ألأول و الآخر و ياخد حقه من البنت كاملا مكملا و بغير نقصان أو شفقة أو رحمة و ساعتها كانت كا الناس هتغلط البنت و كان هو هيبقى صورة مشرفة و نظيفة -على غير العادة- لوزارة الداخلية و لكن اللى هو عمله ده , عبارة عن تأكيد لأنها بالفعل وزارة للبلطجة و البلطجية من أصغر عسكرى فيها لحاااااااااااااااااااااد وزير الداخلية .

صحيح ان كل مهنة فيها الحلو و الوحش , بس المهنة دى بالدات , مهنة حساسة جدا و هى المنوط بيها أنها بتفصل بين الحلو و الوحش فى المهن الأخرى, فبالتالى مينفعش يبقى فيها حلو و وحش و هنا بييجى دور مفتش الداخلية و باب الشكاوى فى وزارة الداخلية , بس أنا بعتقد أنه عبارة عن يافطة على باب من الأبواب و بس , أنهم بالفعل مابيتحركوش الا لما الموضوع يكبر و يبقى قضية رأى عام و الموضوع يوصل للشارع و يبقى موقف الوزارة محرج , لكن اللى يدور , يلاقى مليون و لا بلاش مليون , ممكن آلاف ماتوا من الضرب زى ( خالد سعيد ) و ألاف من بناتنا بيضربوا و مابيتكلموش من خوفهم من بطش بتوع الداخلية زى ( سمية ) , على فكرة , انا لما بقول كلمى بطش بتوع الداخلية , أنا ماببالغش , لأ ده بصحيح , يعنى هو لما تيجى ( سمية ) دى و تقدم بلاغ فى الظابط اللى ضربها , OK مفيش مشاكل , يقوم ييجى جواب اعتقال بكل بساطة باسم أخوها و لا أبوها , هيكون ايه رد فعلهم كأسرة للبنت دى و انتوا عارفين كويس اوى و اللى بيعتقل اليومين دول بيروح فين و بيتعمل فيه ايه و الله أعلم , هيخرج امتى و بيتاخد و يترمى فى المعتقل الى ما شاااااااااااااااء الله,و بدون محاكمة و بعدين يتحاكم و المحكمة تحكم بالبراءة و قبل ما يفرج عنه , يكون طالعله جواب اعتقال جديد و هكدا, يا ترى تصرف أسرة البنت اللى زى ( سمية ) هيكون ايه , أكيد هتتنازل عن البلاغ و هيروحوا كلهم بربطة المعلم يبوسوا جزمة الظابط , على فكرة السيناريو ده مش من بنات أفكارى و لا تأليف لمسرحية جديدة , ده اللى بيحصل بالفعل على أرض الواقع.

السياسة المتبعة لأى مواطن بيشتكى ظابط, أنهم بالفعل بيحققوا مع الظابط , بس بيجيبوا المواطن اللى اشتكى -اللى أكيد مابيبقاش ليه لا ضهر ولا بطن- و بيقولوله أنت متهم بكدا و عليك مخالفات كدا و كدا و كان فيه بلاغ متقدم فيك بكدا و كدا و المواطن ساعة مابيسمع الكلمتين دول , مش هيقولهم أنتوا كدابين , بيبقى فى حالة مايعلم بيها الا ربنا و هما أساتدة و رؤساء أقسام فى الكلام ده, عاوزنا نمشى ميرى..... نمشى ميرى. علينا و عليك , عاوزنا نمشيها ودى , OK , طبعا المواطن المصرى الغلبان هيعمل اييييييييييييه؟؟؟ , هيمشيها ودى و هكدا .

حد يقدر يأكدلى أن الكلام ده مابيحصلش, هل حد يقدر يأكدلى أن كل الشباب اللى مرميين فى المعتقل فعلا, كلهم خطر على الأمن العام , أكيد مليون فى المية لأ .

أنا عمرى ما هنسى منظر الشاب اللى جالنا الصيدلية بتاعتنا فى المنصورة و بقوله أنت بتشتغل ايه , قاللى انا طالب فى رابعة صيدلة و لما قولتله , بس انت شكل سنك كبير أوى على طالب فى صيدلة قاللى أنه كان معتقل من 12سنة !!!!!!!!!!!!! و بدون محاكمة و من غير مايطلعله حكم بالحبس للمدة دى كلها !!!!!!.

شكرا و آسف جدا للاطالة و آسف لو رأيى مختلف مع كتير من الأخوة الأفاضل هنا فى المنتدى .

MERCEDES S550