[fepsceasar]

احنا هنتكلم مع بعض بالبلدى كده ومن الخبرة الشخصية ولو فى اى مصطلحات هنحاول نشرحها ولو فى اى حد عنده معلومة افضل ياريت يصلحلى والمناقشة هتبقى عامة ومش هنرشح اسهم معينة لكن بعد كده ممكن نبقى نبص على نماذج للاسهم فى وقتها
أولا: ايه لازمة البورصة
1- البورصة بتتيح توسيع لقاعدة الملكية يعنى انا لو عندى خمسة آلاف جنيه مش هيبقى عندى شركة لكن ممكن ابقى مساهم فى شركة محترمة، وبوكل مجلس الإدارة فى انه يديرلى فلوسى علشان كده انا ممكن أحضر الجمعية العمومية واقول رايى.
2- تخصيص أمثل للفلوس اللى عندى يعنى انا بدل ما ادى فلوس لحد يشغلهالى وهو ممكن ما يكونش عنده الكفاءة اللازمة او اروح اشارك حد مش كفء فى ادارة الفلوس انا باختار افضل شركة من وجهة نظرى واديهم الفلوس دى يشغلوهالى طبعا الطريقة بتختلف على حسب سهم او سند ودى هنشرحها بعدين.
3- آلية للتمويل قبل ما اشرح النقطة دة لازم افرق بين حاجتين
-(السوق الأولي) الاكتتابات يعنى ودى معناها ان الشركة بدل ما تروح تاخد قرض من البنك بتعمل اكتتاب وبتاخد فلوس من المكتتبين بتكلفة أقل من تكلفة القرض، ولما اشارك فى الاكتتاب انا كده بساهم فى تمويل النشاط الاقتصادى فى البلد (خليكوا فخورين بنفسكوا ايها المستثمرين) لكن خدوا بالكوا من نقطة علشان اكتتب فى شركة لازم اكون عارف الشركة دى عاملة الاكتتاب ده ليه وهتعمل ايه بفلوسى مش بتلم فلوس وخلاص.
4- آلية لتسييل أموالى ودى مرتبطة بالسوق الثانوى يعنى البورصة اللى بنتداول فيها الاسهم والسندات، بمعنى ان انا لو عايز اخلع من الشركة ابيع اسهمى فى اى وقت والاقى حد يشتريها واخد فلوسى، ودى مهمة جدا علشان ما بقاش اتدبست يعنى اروح اكتتب وامول النشاط الاقتصادى وفى الآخر يقولولى لا ما تعرفش تخرج يبقى مش هدخل ولا همول ودى فايدة مهمة للبورصة
مستنى تعليقاتكوا وتجاربكوا سواء حلوة او مرة ونحاول نتعلم من بعض.