المشاركة الأصلية كتبت بواسطة خالدخليفة

يابنى هو انتو شفتو عسكرية
لما كنا فى ثانوى كان فى عميد جيش و2 صولات و3 عساكر
وكانو بيسلمونا بدلة زرقاء شكلها حقير كده وقميص لبنى وكاب وبـيـادة (جزمة الجيش الضخمة دى / اعزكم الله )
وكان لازم نلبسهم ونحضر بيهم الطابور وكان الراجل الصول يبيع فينا ويشترى كل يوم الصبح كأننا عساكر بالظبط
وكان عندنا حصة اسمها حصة التربية العسكرية بندرس فيها قواعد ضرب النار وحاجات تانية كتيرة وكان ليها امتحان صورى كده ملوش علاقة بالمجموع ومع ذلك كان فينا ناس بتتنافس علشان يطلعو الاوائل وكان الصول يشخط وينطر
كأننا فى وحدة عسكرية بالظبط ومعاملة ميرى كما ينبغى
وكنا بنروح نضرب نار فى مدرسة النقراشى الثانوية خلف المخابرات العامة بكوبرى القبة لان كان عندهم ميدان رماية
وكانو بيسلمونا بندقية اسمها مورس (او موريس ) و..دى 3 طلقات واضرب يامعلم
ولما جيت اضرب الورقة اللى بضرب عليها طارت
وبالذكاء الصعيدى وقفت اثناء ضرب النار (كلنا منبطحين على الارض) وقلت للصول الورقة طارت هروح اجيبها
وشخط فيا وقال / ارجع واضرب فى اى حتة انت عايز تموت؟؟؟؟ هتمشى وسط الرصاص الحى ده ازاى؟؟؟؟؟؟؟؟
هههههههههههه صحيح الناس بتضرب ناربطلقات حقيقية وانا همشى وسطها ازاى ؟؟؟؟
وكنا نركب بملابسنا العسكرية دى القطار بتاع المرج القديم اللى زى قطار ابو قير حاليا و طبعا بسبب الزحام كنابندوس على رجلين الركاب بدون قصد طبعا وكانت الركاب تشتم وتزعق وتتخانق معانا لان الحذاء الميرى كان تقيل جدا وناشف جدا
وطبعا اتلغى كل هذا الكلام
عسكرية أيه اللى بتحكى عليها ياابو عسكرية انت
منجيلكش ف عسكرية ههههههههههههه