[Walid Samy]

المشاركة الأصلية كتبت بواسطة mido magdy والله العظيم اى واحد كان مكان ظابط الشرطه كان جرجرها من شعرها علشان عيله عندها 21 سنه تستفز ظابط على الاقل عنده 30 سنه وتكلمه بالاسلوب ده يبقى البيت اللى طلعه منه مربهاش وكمان معهاش كارنيه وعايزه تدخل بالعافيه وهما 5 بنات عملين الفيلم ده وبقيت البنات ييجى 100 بند دخلت من البوابه ومحدش قالهم نص كلمه طول الفيديو ده فيلم تاليف وانتاج واخراج : الاخوان المسلمين

إيه بس يا عم ميدو .. اهدى شوية .. هى مين دى اللى تتجرجر من شعرها .. فى إيه يا عم ؟؟ هى فين الرجولة والنخوة والكرامة (اللى أنا متأكد إنهم عندك طبعا) علشان نسمح لواحد يمد إيده على واحدة ست .... هى دى لو أمك أو أختك ترضى إن راجل يمد إيده عليها حتى لو غلطانة لأ وإيه يجيبلها نزيف فى المخ ... يانهار أسود .. هو احنا عايشين فى بلدنا ولا بقينا محتلين ومستعمرين علشان بناتنا وأخواتنا وأمهاتنا وحريمنا يتجرجروا من شعرهم ..ده حتى أيام الإحتلال الإنجليزى لمصر كان فى خط أحمر وهما بنات البلد محدش كان يستجرى يلمس أو يتعدى على واحدة ست, مش يضربها ويجيبلها نزيف فى المخ زى ما النيابة أثبتت وتم تحويل الباشا الضابط الهمام للمحاكمة ... إيه المنطق الغريب ده .. دول بتاع أمن الدولة نفسهم ميقدروش يقولوا الكلام دة ...
وعلى كل الأحوال تعالى نناقش اللى حضرتك قلته واحدة واحدة وبهدوء وبعقل:

1. بحكم القانون الحرس الجامعى التابع للداخلية وأمن الدولة وجوده فى الجامعة غير قانونى وغير شرعى وهذا الحكم أصدرته المحكمة الإدارية العليا ويجب على الحكومة تنفيذ الحكم حتى لو قامت بالطعن عليه . يعنى وجود الضابط ده أساسا غلط .
2. حتى بافتراض شرعية وجود الضابط ده فى مكانه فحدوده هى أن ينظم دخول الطلبة أى رؤية الكارنيه فقط وليس له الحق فى تفتيش الطلبة تفتيش ذاتى (لأ دى المصيبة إنه عايز يفتش الطالبات)
3. طبعا حضرتك مصرى وعايش فى مصر وعارف إن ربنا ابتلانا باستبداد وقمع وتزوير انتخابات وكل ده بيتم عن طريق أجهزة الأمن وخاصة جهاز مباحث أمن الدولة ومن خلال حماية قانون الطوارئ اللى بيطبق من 30 سنة ( بالمناسبة .. حضرتك تعرف أن مصر دخلت موسوعة جينيس للأرقام القياسية على أنها أطول مدة طوارئ تعيشها دولة فى العالم )
4. وأكيد أنت عارف إن أكتر ناس متبهدلة ومتمرط بيهم الأرض بسبب قانون الطوارئ علشان بيعارضوا نظام الحكم هما الإخوان المسلمين . يعنى أغرب حاجة إن الجواسيس الإسرائيليين يتحاكموا أمام محاكم مدنية ويتم العفو عنهم رئاسيا لكن الإخوان يتحاكموا أمام محاكم عسكرية . والأغرب إن كلهم من أرقى وأثقف طبقات المجتمع زى قضية أساتذة الجامعة اللى كان فيها تقريبا 18 أستاذ وعالم جامعى لدرجة إن الأمم المتحدة أرسلت نداء للرئيس مبارك بالعفو عن أحدهم لحاجة الإنسانية لعلمه وأبحاثه .. تخيل (الإنسانية).. بس طبعا على مين .. هو فاكر نفسه جاسوس إسرائيلى علشان يتم العفو عنه .
5. ولو حضرتك خريج جامعة تبقى أكيد عارف أن طلبة وطالبات الإخوان دائما بيتشطبوا من قوائم اتحاد الطلبة ويتم التضييق عليهم ولو حد فيهم كان متفوق وطلع الأول على دفعته يمنع من التعيين فى الجامعة .. طبعا لو كان جاسوس إسرائيلى كان ممكن يتعين ...
6. ولو حضرتك خريج جامعة تبقى أكيد عارف أن حرس الجامعة بيمنع طلبة وطالبات الإخوان من دخول الجامعة فى الأيام اللبش اللى بيتظاهروا فيها بسبب انتخابات اتحاد الطلبة أو أى مناسبة سياسية .. وميدخلوش حتى لو معاهم الكارنيه ..
7. وطبعا حرس الجامعة بيبقى عارف مجموعة من طلبة الإخوان الولاد فيمنعهم لكن ميعرفهمش كلهم .. لكن طبعا الطالبات مميزات بلبسهم الخمار فرصدهم وحصرهم ومنعهم أسهل كتير .. يعنى البنت معاها الكارنيه أو معهاش مش فارقة لأنها مش هاتدخل فى كل الأحوال..
8. وبعدين طبعا بالحداقة هتشوف إن ال 100 بنت اللى دخلوا مهماش من الإخوان ولو لاحظت إن محدش بص على كارنيهاتهم .. لأن القضية مش قضية كارنيه على الإطلاق
9. وفى الآخر عايز أقولك إن الإخوان مش محتاجين يعملوا فيلم علشان الناس تتعاطف معاهم وتكره الحكومة لأن ده حاصل بالفعل من غير الأفلام دى

وفى النهاية عايز اقولك والله العظيم أنا مش من الإخوان (رغم إن أنا مش شايف إنها تهمة) وماتفتكرش إن أنا بدافع عنهم وخلاص .. لأ أنا واحد مصرى قرفان من الحال اللى وصلت ليه البلد ونفسى بلدنا تتغير للأحسن واستحالة ده هيحصل مع الناس اللى كابسة على نفسنا

وأرجوا إنك ما تزعلش من كلامى لو كان فيه حاجة ضايقتك