[Eng . Mano]

طبعا زى ما الاغلبية منكم عرفت انى جبت الحمد لله اسبرانزا 113 ، و كنت بسأل على مركز صيانة اعمل فيه صيانة الالف فى منطقة جسر السويس ، فحضراتكم رشحتوا ليا مركز تكنوسيرفس 2 و ذكرتوا انه افضل من تكنوسيرفس العادى ، و طبعا بعد رأى الاغلبية قررت انى اروح اعمل فيه صيانة الالف .
اللى حصل انى النهاردة كنت مع واحد صاحبى ساكن جنبى و معاه اسبيرانزا تيجو 2010 عامل بيها 10000 كيلو و راح هناك عمل صيانة الالف و الخمسة و العشرة الالاف راح عملها فى ابورواش . فقولت ليه انى رايح اعمل الصيانة عندهم قالى اوعى تروح عندهم و قعد يحذرنى جامد جدا ، قولت له ليه يعنى ؟ قالى انهم بياخدوا السُرة بتاعة الكاوتش اللى بتغطى مسامير العجل ، و ممكن يغيروا قطع غيار اصلية و سليمة 100% و يبدلوها بحاجات مستهلكة و اى كلام ، و ممكن الموضوع ده يعملوه فى كشافات او انوار ، و اى سيديهات فى العربية بياخدوها هى و وصلة الusb.
و قالى انهم بياخدوا يلفوا بالعربية فى الشارع و يخمسوا بيها و طبعا ده بحجة انهم بيجربوها ، و قالى ان ده حصل فعلا قدامه فى عربية ام 11 . ده غير ان ممنوع انى اقف معاهم و هما بيعملوا الصيانة .
ارجوكم قولولى اعمل ايه ؟ لانى فعلا فى حيرة فظيعة ، و صعب عليا اطلع ابورواش لانه فعلا بعيد عليا و ممكن اتوه هناك ، ده غير انى ساكن قريب من تكنوسيرفس ده . و من ناحية تانية مش عايز العربية اللى دفعت فيها دم قلبى ، شوية ناس معندهاش ضمير يخربوهالى .
عايز اعرف فعلا منكم و من اللى مجرب المركز ده هل هو فعلا كويس ، و يمكن صاحبى ده بالغ فى الكلام ، ولا عنده حق و بيلعبوا فى العربيات .
ارجوكم دلونى على الصح ، لان العربية قربت تعمل 1000 كيلو و عايز احجز بسرعة . و هل لو روحت ابورواش حيبقوا اضمن من مركز تكنوسيرفس ده ولا العملية متساوية .
مستنى رأيكم و لكم منى جزيل الشكر ؛؛