[Injection]

المشاركة الأصلية كتبت بواسطة مهند سالم معلش يا أستاذ انجكشن هأتقل عليك شوية بكام سؤال: أولا إيه الفرق بين ال8صباب وال16 صباب من ناحية كل شيء: استهلاك البنزين، نعومة المكنة والسحب والقوة والعزم. ثانيا: إيه الفرق بين الماتور الكامة الواحدة وال2 كامة من ناحية كل شيء برده. ثالثًا: مش سير الكاتينة برده هو إلا ماسك من عمود الكامة لعمود الكرانك، طيب لو هو ده فعلا فليه بق لما بينقطع بيجيب صباب؟ وشكرا ليك مقدما

أستاذ أيه بس ياباشا, أنا كبيرى "ياض"

ال 8 صباب أستهلاكه فى البنزين أقل من ال 16 صباب, لأن عدد الصبابات الزيادة بيزود كمية البنزين والهواء الداخلة للموتور خاصة على عدد لفات عالى وبالتالى زيادة فى أستهلاك البنزين.

سحب المكنة ال 16 صباب أعلى من ال8 صباب بنسبة بسيطة فى الأول علشان العزم متقارب, لكن بعد كده ال 16 صباب بتطير علشان الهورس باور بتاعها أعلى, والصبابات الزيادة بتسهل دخول الوقود للموتور وخروج العادم منه, والمكنة ال 2 كامة بتبقى معمولة للطرق السريعة علشان بتبقى مرتاحة فى السرعات العالية عن ال 8 صباب, وعلى العكس, ال 8صباب معمولة للمدينة علشان أستهلاكها للبنزين أقل وعزمها تحت ال 100 كيلو/ساعة مشابه للمكنة ال 2 كامة, وبالتالى فى السير داخل المدينة هى تكسب.

المكنة الكامتين بتبقى غالبا نسخة محدثة من المكنة الكامة واحدة, وبتبقى معموالة علشان تزود عدد الصمامات من 8 الى 16 مثلا.

والعزم بيبقى مرتبط مبدأيا بحجم الموتور ونسب تروس الفتيس, فال 8 صبابات الزيادة بيزودوا السحب, وبيرفعوا الهورس باور جامد بعد كده.

نعومة المكنة دى بصراحة معرفهاش, وكمان صعب تحديد أيه المقصود "بنعومة المكنة" , كسلاسة فى الأداء فالأثنين مواتير مفيش فرق بينهم وبين بعض.

مفيش فروق أساسية أنا على علم بيها غير اللى حضرتك ذكرتها, يعنى الأداء وأستهلاك البنزين, وطبعا تصميم الموتور بيتعقد زيادة فى التصميم الكامتين, وطبعا الموتور الكامتين أتقل من الكامة الواحدة.

أنت قلت ياباشا سير الكاتينة مرتبط بالكامة وعمود الكرنك, صح, والكامة بتلف مع سير الكاتينة وبتفتح وتقفل الصبابات, فلما السير يتقطع الكامة هتلف لفة ولا حاجة وتقف, كده الصبابات ثبتت فى مكانها سواء مفتوحة أو مقفولة والموتور شغال وبيلف, فالبستم بيطلع يلاقى الصباب مفتوح يقوم مطيره.



هنا مثلا, لو الكامة بطلت تلف وفيه صباب مفتوح, البستم مرتبط بعمود الكرنك ومازال بيلف, فهيطلع لفوق بالقصور الذاتى ويخبط فى الصباب المفتوح, وأنتهى الموضوع.