[Injection]

عايز الحق, الكاسيت تعبان ملة, اللانوس 2 بتنزل بكاسيت كلاريون برضه تقريبا 60 وات×4 , والسماعات اللى العضو أقترحهم حوالى 60 أو 70 وات فعليا, الكاسيت بتاعك ميقومهمش كويس, أنا مركب طقم كينوود ب210 منهم على الكاسيت المذكور أعلاه وشغالين تمام.

هتلاحظ فرق بعد تركيب السماعات فى جودة الصوت, ولو السماعات القديمة بتيجى على الأخر وتخروش بقى هتلاحظ فرق فى أرتفاع الصوت (الخروشة لأن السماعات القديمة أقل من الكاسيت فى القدرة).

بس الفرق مشابه لماسورة مياه بيمشى جواها ضغط معين, لو كبرت الماسورة والضغط هو هو أنت ما أستفدتش حاجة فعليا.



ممكن تصبر نفسك بجوز سماعات صينى 30 أو 35 وات (الرقم ده أسمه الأر أم أس RMS وهو اللى بيحدد القدرة الفعلية للسماعة) وهيدوك صوت مش بطال بحوالى 60 جنيه, ولو الراجل عمل بهلوان أسأله على الأر أم أس بتاعها أو حاول تقراه من على العلبة, وهات سماعات فى حدود قدرة الكاسيت أو أكبر.

وممكن تغير الكاسيت بواحد مقدرته أعلى وتجيب طقم سماعات فى حدود قدرة الكاسيت الجديد, أو تركب جى أم (أمبليفاير) على الكاسيت القديم وطقم سماعات قوى وده هيديك صوت خيالى بس بسعر عالى.

بس خلى بالك من حاجة مهمة أوى, الفتحات بتاعة السماعات اللى فى اللانوس مدورة مش بيضاوية, بمعنى لو جبت سماعات بيضاوى ياهتضطر تركب قواعد ليهم أو تقطع فى الصاج علشان تركبهم.