ملعون أبو الكورة
عجيب أمر هذا الشعب والشعوب العربية كلها لابد ان فى الأمر سر
مهو مش معقول هذا الهوس الكروى العجيب لابد ان فى الامر شىء مخطط له لالهاء هذا الشعب والشعوب العربية كلها عن قضاياه الأساسية
وسبب هذا الكلام ملحوظات متعددة من خلال سفرياتى الكثيرة
اولا / استغلال فرحة الشعب بفوز مصر فى كل مبارة نكسبها فى بطولات الأمم الافريقية الثلاثة الأخيرة وخصوصا البطولة قبل الأخيرة
فقد قفزت الأسعارالى الضعف تقريبا وقتها
وكنت اسأل هو النتيجة كام كام فيقولو 1 / صفر لمصر
فأضع يدى على قلبى واقول / استر يارب
وفى نهاية المباراة أسأل / كام كام
مصر كسبت
وأقول فى نفسى وليس علنا طبعا لكى لا اتهم بالخيانة العظمى / يادى الخيبة مصر كسبت والشعب خسر
وفعلا وقتها ارتفعت اسعار السلع بطريقة جنونية
مثلا
الزيت حجم واحد لتر / من 5 جنيه الى 12 جنيه ثم هبط الى 11 جنيه
السكر الكيلو من 2 جنيه ونص الى 5 جنيه
وغيره الكثير
هل هذا الشعب بهذا السفه حتى تستغل انتصارات الكورة فى غلاء الاسعار
ملعون أبو الكورة
ثانيا / كنا نتناقش مرة فى القطار عن حرب اكتوبر وهى اخر معركة وملحمة بطوليه حقيقة لهذا الشعب وسياتى عنها موضوع منفصل
وسألت احد الشباب / تعرف ايه عن حرب اكتوبر
والحقيقة رد عليا بطريقة حرقت دمى
فقال بسلامته / اه دى حرب كانت بيننا وبين اسرائيل وكسبناهم
انا بغيظ / كسبناهم ؟؟؟؟؟ هو ماتش كورة
فضحك وقال مستدركا (لحق نفسه يعنى ) / يبقى اتعادلنا ههههههههه
مفيش فايدة
ملعون أبو الكورة
ثالثا / راكب القطار فى مرة وكان هناك مباراة بين الاهلى والزمالك تقريبا او مباراة يلعبها الاهلى مع فريق والزمالك مع فريق اخر
ووقتها الاهلى احرز هدفا والزمالك دخل فيه هدفا
المهم ان الاهلى منتصر والزمالك مهزوم
ووجدت مجموعة من الركاب يغيظون مجموعة اخرى ومنهم بياعين بياكلو عيش من البيع فى القطار
ثم بعد قليل
حدث العكس الاهلى استقبل هدفا والزمالك احرز هدفا
وانقلب الملعب داخل القطار
ثم بعد قليل انتهت المباراة او المباراتان بفوز الاهلى وهزيمة الزمالك
وحدثت مناقشات حادة تطورت احداها الى خناقة
ايه ده ؟؟؟ وايه السفه ده
ملعون أبو الكورة
رابعا / استنفار اعلامى رهيب من اجل مباراة بيننا وبين الجزائروأعلام مصر تباع وفوجئت ان تجارة الأعلام مابين علم الاهلى وعلم مصر اصبحت تجارة رائجة
ووصلت الى اننى رايت عندنا فى منطقة الزيتون بالقاهرة
احد اصحاب المحلات احضر 5 سماعات ضخمة من بتوع الدى جى بتاع الافراح
ووضعها امام المحل وطول النهار يذيع اغانى وطنية
ثم حدث ماحدث بيننا وبين الجزائر وهو معروف
وكان الناتج معظم المصريين العاملين والمستثمرين بالجزائر عوملو كرهائن حرب
وفسدت العلاقات بيننا وبين الجزائر
ولاتجد حديث فى كل مكان الا عن المباراة واحنا نشتم فيهم وهم يشتمو فينا
ثم عايرونا بفقرنا لانهم اغنى مننا
وتطرق الموضوع اننا عايرناهم باننا ساعدناهم فى حرب الاستقلال
ثم زاد الموضوع ومنعت شركة سوناطراك عننا انابيب البوتاجادز ووصلت الانبوبة الى 70 جنيه على الغلبان
بسبب الكورة
وكنت اسافر انحاء مصر وارى قتلى البوتاجاز وطوابير البوتاجاز
ثم اقرأ فى الجرايد اننا علينا فــلوس كتير وبلطجية مبندفعش
فمنعو عننا البوتاجاز
يعنى فجأة اكتشفو اننا بلطجية ومبندفعش بعد مباراتنا معاهم
ملعون أبو الكورة
خامسا / الثقافة عندنا بقت كروية بشكل رهيب ثم تسأل احدهم عن القعقاع بن عمرو
فيقول لك / ده غالبا واحد من أولياء الله الصالحين
وسألت احد علماء الكورة (لايفوته مباراة ولاخبر عن اى لاعب فى مصر)
وقلت له بكل ثقه / انت تعرف الامام الشافعى
فقال بكل غرور / عارفه ده انا اتطاهرت فيه زمان
(زمان كانت الستات فى مصر تذهب الى حلاق الصحة ويكون موجودا بجوار احد المساجد الكبيرة لاجراء عمليات الختان)
وأخر سأ لته عن عباس العقاد فقال بأسف / ده انا مبروحش هناك بسبب المرور الواقف دايما لكن لما بروح الاستاد بعدى من هناك
تصورو ا
ثم تلاحظ الاحاديث بين الناس فتجد غالبيتها عن الكورة
ملعون أبو الكورة
سادسا / ملحوظة عجيبة فى كل البلاد بلا استثناء
اثناء المبارايات المهمة او غير المهمة
اذا دخلت على بائع لتشترى منه شىء تجده مبحلق ومبرق للتلفزيون ولايحس بيك لما تدخل
وتسأل السؤال اكتر من مرة وهو ولاهو هنا ولما يحس انك هتمشى يبص لك بغباء ويقول / عايز ايه
يعنى معنى كده انه شايفك وحاسس بيك بس مطنشك وبيصطادك وانت خارج
شىء مقزز
وأذكر مرة كنت فى المنصورة وكانت مباراة للاهلى والزمالك فى كأس مصر وفاز بها الاهلى بعد ان كان مهزوما
ولم يخرج بنا سواق الميكروباس من الموقف الا بعد نهاية الشوط الرابع
ملعون أبو الكورة
سابعا / تغيرت النظرة الى البطل
الاهلى فوق الجميع
الاتحاد سيد البلد
الزمالك فوق الكل
المصرى مش عارف ايه
الاسماعيلى نظامه ايه
ايه ده
وتسأل واحد مين اعظم قائد عسكرى فى التاريخ يقول لك نابليون
طيب يابنى وسيدنا خالد بن الوليد راح فين
يقول لك سيدنا خالد ده من الصحابة
وهو اللى من الصحابة مينفعش يبقى قائد عسكرى ؟؟ ثم بس ده اللى تعرفه عن سيدنا خالد ؟؟؟؟
اى كلام فى اى حتة
ملعون ثم ملعون ثم ملعون ابو الكورة
ملحوظة
كاتب هذه السطور والملحوظات كان اهلاوى متعصب جدا واذا لحقت بالأهلى هزيمة كنت اذهب الى المدرسة متخفيا حتى يدق جرس بداية الطابور
ولعبت 7 سنوات فى دورى المدرسة من سادسة ابتدائى حتى ثالثة ثانوى
وحاصل على بطولة الدورى منهم 3 مرات فى تانية اعدادى مرة ومرتين فى اولى وتانية ثانوى
وكابتن منتخب مدرسة القبة الثانوية وحارس مرماها عام 1982
ثم شفانى الله من هذا المرض اللعين
اللهم أشف جميع اخواننا مرضى الكورة من العرب والمسلمين
اللهم آمين