حلة محشي ب 82 جنية و 30 جنية اوردحي ( من غير لحوم )
من يومين الحاجة قررت انها تعمل محشي
نزلت تجيب الحاجة كالتالي
كرنبة ب 8 جنية ( ام 3 جنية السنة اللي فاتت مش من 10 سنين )
شوية خضرة بقدونس وشبت وكسبرة 2 جنية ( ابو نص جنية من قبل رمضان )
كيلو الطماطم كانت موجوده في البيت الحمد لله لكنها بتسأل على سعر اليوم كان 10 جنية ( اللي كان في اول رمضان ب 4 وكنا مستغلينه )
المهم في حوار بيدور بين الستات اللي هناك والحاجة واقفة وانا طبعا شايل
واحده بتهزر مع بتاعت الخضار بتقولها يا مفتريه 10 جنية كرنبايه ومعاها الخضرة بتاعتها
ردت عليها بتاعت الخضار بتقولها ونسيتي تاخدي معاكم كيلو طماطم ب 10 جنيه كمان
ردت واحده تالته طيب وفين بقى الرز والبصل والزيت والسمن
راحت الحاجة ( امي يعني ) بتقولهم واعموا حسابكم في كمان 10 رز وبصل وسمن
ردت عليها اول واحده طيب نعمل ايه بقى في الشوربة ده كيلو اللحمة اقل حاجة 52
ردت علينا تاني واحد بتقولها خلاص وفري الي 50 واعمليه بشوربة ماجي وخليها اورديحي
وقعدوا هما الخمسة يضحكوا وفطسوا على روحهم من الضحك
بذمتكم فيه شعب في العالم زينا
مع كل الهموم دي ولسه فينا ناس بتضحك