لاويه لي علي طول بوزها
ناسيه يا خلق ان البعيد جوزها
ليلاتي عكننه ..ونكد.. وتصبح تاني لاويه لي بوزها
بالذمه ياناس ده يجوز ...؟
هو أنا عفريت طالع م الكوز؟
ولا يظهر اني م الغلب بقيت عجوز ..!
هدومي ياناس بنفسي أغسلها
ولو حاجه ف البيت مايله أعدلها
ولوزباله ع الارض اشيلها
ولو طلبت لبن العصفور لازم يجيلها
بالذمه ده إسمه كلام ؟
منين ياناس يجي الهيام؟
ولا ده يبقي عش غرام...!
لو فتحت خشمي تقول ده حرام
ولو ف يوم انبتها ..
أو م التعب وبختها
تشيل شنطتها وتجري علي امها
دا الناس بتحسدها وتقول يا بختها
علي طيبتي وكرمي مفيش زييها
و ازيدكم كمان م الشعر بيت
لا عمري لغيرها بصيت
ولا ف يوم سهرت بره البيت
وكل أمورها كفيت ووفيت
حتي وانا باقلي البتنجان ..اتقلب علي الزيت
ف الآخرهتقول علي غلطان
وف أمور الحريم مش فهمان
تلاقيك نسيت آلاعيب زمان ..!
جربت ...وجبت لها ميت فستان
وف يوم ولعت شمع يملا ميدان
ومن حلو الكلام شنفت الودان
وف الآخر ...سمعت صوت الشخير ..!
كان أحلي شويه من صوت الحمير
وبعيد كل البعد عن تغريد العصافير
قلت ف عقل بالي .....
دا العازب ياناس أمير
العيال جعلوا مني أتعس أسير
وف الصبح ياحضرات
كان نفسي أصحي علي قبلات
أو ع الأقل تقوللي تلات كلمات
حبيبي...صباح ...الخيرات ...!
إصحي ....فوق...بتاع الفول فات ..
دا كان رد فعلها عن ليله إمبارح ياحضرات ..!
بسببها بقيت ع القهوه مقيم
وف كلامي مع صنف الحريم بقيت غشيم
وأهملت نفسي وشكلي الوسيم
إتقوا الله فينا ياصنف الحريم
مش ضعف ابدا سكوت الرجاله
جربوا مره تعملوا لرجالتكوا هاله ..
م التقديس والإحترام راح تصبكم حاله
للسعاده والسكن النفس مياله
وف نجاحكم مش راح تكونوا ع المجتمع عاله