المشاركة الأصلية كتبت بواسطة خالدخليفة
بــورسعـيـد
وبورسعيد مدينة جميلة بناها راجل مهندس مخبول ومغرور اسمه ديليـسـيـبـس فى عهد الخديوى اسماعيل وسميت بهذا الاسم نسبة الى فلاح اسمه سعيد لما لقى المنطقة دى كلها اراضى بور قرر يزرعها وزرع مساحة كبيرة ونط له فيها ديليسيبس
وكانت الناس تقول سعيد زرع الارض البور فسميت بور سعيد
نرجع لبورسعيد
و من اول م تركب الاتوبيس فى الماظة ولحد م تنزل البلد تشم ريحة التجارة والتجار فى كل مكان
وفى يوم بورسعيد ده اخدنا جمال (حبـيـبـى سواق التاكسى ) بتاع زمان وطلعنا على بورسعيد هنجيب شوية بضاعة من مستورد كبير هناك وكان جايب كونـتـيـنـر عطور كبير لحسابنا ورايحين نـتـفـق عليه ووصلنا بالفعل هناك وروحنا للراجل فى مكتبه بالحى الأفرنجى ولقيناه فى المينا بيخلص شوية شغل وقررنا نسـتـنـاه انا وشركائى ولأنى مبعرفش اقعد على حيـلى قلت ياواد انزل استكشف فى البلد وجمال مسك فى رقبتى وقال جاى معاك
يالا ياعم جمال
ولفينا فى البلد من التجارى لسوق السمك للتلاتينى لكن انا هاودت جمال وانا فى دماغى مبنى هيئة القناة وجريت اشوفه لقيت منظره حاجة ابهة صحيح يخرب بيتك ياديـليـسبس تبنيه بالابهة دى وتـتـقـنـزح علينا بعدها تقولشى بانيـه لوجه الله
ولقيت معدية واقفة والناس والعربيات عمالين يركبو
رايحة فين دى
بور فؤاد
نط ياجمال
وراك ياحاج خالد
ولفينا بور فؤاد كلها على رجلينا
مدينة هاااااااااااااااادية خااااااااااااااالص (من 10 سنين )
جمال / يالا ياعم المغرب هيأذن وانا بخاف من الهدوء ده
تـقـل قلبك ياجيمى
ابدا يالا ياعم
ماشى
ورجعنا على المعدية وركبناها رجعنا بورسعيد تانى
وطيران على الافرنجى لاننا نسينا نفسنا
ووصلنا لقيت الراجل لسه جاى من 5 دقايق ولسه الجماعة فى المقدمة والسلامات والتحيات
واحنا قاعدين دخل واحد كـشـر(بكسر الكاف والشين )وواضح انه ظابط مباحث
الظابط موجها كلامه للمستورد بلهجة حازمة / انت الحاج فلان
بتردد / أيوه انا
وفتح لفة كانت معاه وقال / الحاجة دى بتاعتك ؟؟
والراجل اتخض وتردد وتلعثم (اتلجلج) / معرفش
متعرفش ازاى كل السوق بيقول دى بتاعتك
ممكن تكون بتاعتى وممكن لا
احنا لقينا كونـتـيـنـر مرمى فى المينا ملوش صاحب وكل السوق اجمع ان دى بضاعتك
ثم نظر الظابط الينا وكمل كلامه / عموما هسيبك لضيوفك وهستناك بالليل فى مكتبى
ماشى ياباشا
وجمال لسانه متـبرى منه وميل عليا وهمس فى ودنى بهزار / ابسط ياعم وشك حلو على الراجل دخلت عليه وجبت له ف رجليك المباحث
وانا بكل حزم / بس ياجمال
والراجل تمالك اعصابه
ولقيته بيقول / يالا ياجماعة انا عازمكم تـتـغدو معايا فى مطعم البرج
(مطعم مأكولات بحرية كبير ومكانش له فروع تانية لكن فتح فرع تانى من كام سنة فى تقاطع الطيران مع مصطفى النحاس)
وطبعا بعد اصرار منه لانه كان حاجز الترابيزة من قبلها بيوم روحنا معاه
ودخلنا المطعم
وحصل شىء غريب
جنب كل واحد مننا واقف واحد من جرسونات المطعم زى م تقول كده حارس او غـفـيـر
أيه ده ياعم انت جايـبـلنا دول يراقبونا والا ايه
المهم انا انكسفت واكلت من الاكل اللى اتحط ادامى وكان حاجة اسمها كفتة السمك (6 قطع بالظبط)ويادوب خلصتها لقيت الغـفـيـر بتاعى راح حاطط طبق تانى
(و كل طبق تحس محطوطة فيه كميات بسيطة كأنها مقصودة وفعلا كانت مقصودة)
ويادوب خلصته
راح حاطط صنف تالت ورابع وهكذا وانا تعبت من الاكل ومكسوف من صاحبنا اللى واقف جنبى زى عامود النور وكل م اخلص حاجة يحط غيرها وبصيت للشركا هيموتو من الاكل ونفس القصة محرجين من الغـفـيـر وصاحبنا جمال مبقاش قادر ياخد نفسه (من التنفس)
وميل عليا وقال / الحقنى ياخلود هموت والغفير ده مش عاتـقـنـى
وتشجعت وكلمت صاحب العزومة / ياحاج فلان انا تعبت من الأكل وصاحبنا ده مش عايز يبطل وانا هودى الأكل فين ؟؟؟؟
ضحك وقال / هو عنده تعليمات ميـبـطلش اصناف لحد م انت تقولو كفاية
والله ؟؟
اه والله
طب م تقول كده من الصبح
خد ياعم وروحت مدى الغفير بتاعى فوطة السفرة وقمت
وكلهم قامو جرى ورايا
وخرجنا بعد م شكرنا الراجل واتفقنا هنستلم البضاعة امتى وازاى
وجمال لازم يشترى سمك هو والشركا
والحقيقة دى عادة سيئة فيا خلصت شغل ارجع البيت بغض النظر عن البلد اللى انا فيها
بتشتهر بأيـه
واشترو سمك وملابس وشغلانة كده
وانا اشتريت شيكولاتة بيضا مقسمة مربعات صغيرة وبس
وركبنا العربية
ودخلنا الجمرك ولقينا معاملة سيئة
ايه يااخواننا ليكو قرش خدوه وخلاص خالتى وخالتك واتفرقو الخالات
وبعد الجملتين دول لقيت شوية اشرار سابو الجمرك كله واتلمو حواليا
وانت مين يافيلسوف
وانت هتعرفنى ليه هتناسبنى ؟؟؟؟
ولقيت صوت بيقول / فتشو العربية ؟؟؟
وفتشوها زى م يكون مهربين مخدرات مقبوض عليهم
اثناء التفتيش نادانى واحد وقال / لم نفسك شوية لان المصرى مغلوب من الاهلى بجون مش معترفين بيه والبلد مولعة
اااااااااه ه ه ه هو الأهلى كان هنا النهاردة ؟؟؟
اه
ماشى واتصلت بالحاج فلان
الحقنا ياحاج
خير مزنوقين فى الجمرك والمصرى مغلوب وانت فاهم بقى
ضحك وقال / عينى 5 دقايق بالظبط هتكون مشيت
وفعلا فوجئت بمأمور الجمرك بعد 5 دقايق بينادى
فين الاستاذ / خالد خليفة
ورديت / انا
لامؤاخذة يابيه احنا اسفين اتفضلو
لكن ببص على جمال
اختفى
ودورنا انا والشركا عليه
اتاريه فى المعمعة ركن عربيته على جنب بعيد ورا عربية كبيرة كده علشان محدش يكسرها
ومشينا بس بعد يوم شاق انتهى بحركة من بتوع جمال
ههههههههههههههه
|
فعلا بورسعيد مدينه جميله جدا لكن سبب تسميتها ببورسعيد
مش عشان الحاج سعيد الى زرع الارض البور ...لكن نسبه للملك سعيد وهى اسمها بالعربى كان الفرما ايامها واتسمت بورسعيد للاسف من معناها بالانجليزى Portsaid
وزيها بورفؤاد وبورتوفيق فى السويس
---------------------------------------
قصه جميله وياريت تزور بورسعيد اليومين دول البلد اتغيرت كتير وعلى فكره مطعم البرج الوقت ليه فرع فى دبى
