[alymonir]

السلام عليكم و رحمة الله
مفاجأة
كعادة مواضيعي المملة اللي باصدعكم بيها معايا ( و حاسس اني حانطرد من المنتدى قريب ) لأني مابضفش جديد في الغالب
كلها استفسارات
أتمنى انى أفيد المنتدى في يوم من الأيام
لأنه فعلا زي عيلتي التانية
المهم
طبعا كلكم عارفين قصتي في الشراء و حيرتي في الموديلات
و للأسف اخر موضوع ليا للمقارنة بين أفضل سيارة أشتريها جت الازالة أخدته ( أصله كان في الدور 22 مخالف يعني )
كان كلامي كله على المفاضلة بين الكورولا و الكروز و السيراتو
يعني
في الغالب
واحد معايا في الشغل فرقع قنبلة في دماغي و عرض عليا عرض رهييييب
فيه عربية معروضة للبيع ( استعمال )
غريبة مش كدة
اه والله ما كان في دماغي المستعمل إطلاقا
المهم السيارة دي هوندا سيتى موديل 2006 أوتوماتيك
مرفوعة من 2007 و حتى الان
عاملة 11000 كم ( احدى عشر ألفا ) علشان محدش يقرا الرقم غلط
و مطلوب فيها 65 ألف بس
طبعا الكلام كله على لسان الراجل اللي مبلغني ( زي وسيط كدة ) و ليس صاحب السيارة
عايز رأيكم بجد
وهل تعتبر دي فرصة و لا أستنى شوية و أمشي في السكة اللي كنت ماشي فيها قبل كدة ؟؟؟
مع العلم بأني في الحالة دي حاوفر مبلغ كاش + إني مش حاخد قرض من الشركة
بس المشكلة إني خايف من الهوندا للأسباب الاتية :
1- سعر قطع الغيار غالية جدا
2- العربية واطية جدا على الأرض
3- إعادة البيع صعبة جدا
4- مش عارف توكيلها و صيانتها نظامهم إيه ؟
عايز اراءكم يا شباب بسرعة لأني المفروض أرد على الراجل بكرة علشان يكلم صاحب العربية قبل ما تطير