[حسام البورسعيدى]

طيب يا باشا ....

اولا موتورك راسى مش T او V

ثانيا هل الشكمان بيطلع دخان ابيض ؟؟؟؟
لو بيطلع يبقى الميه بتدخل فى الحرق مش فى الزيت بس انا بستبعد الاحتمال ده ...

انا هاقولك بقى الخلاصة بتاعه الموضوع ده ....

شوف يا غالى .. انت تيجى والعربية بارده وتفتح غطاء الريداتير وتدور وتزود ميه فى الريداتير لغاية الفوهة بتاعته لو لقيت الميه بتبقلل بتعمل فقاعات كده وتطلع وتنزل يبقى عندك الجوان ضارب لو الميه ثابته يبقى العيب مش من الجوان

برضه شوف الميه فيها صدأ ولا لا

وعلى فكرة ممكن تكون الطرمبه مش بتقلب او تقليبها ضعيف وده محتمل برضه

من الاخر هيكون شغلك عند بتاع الريداتير (اول حاجة قله عايز اعمل غسيل دورة الميه)
هيقوم فاكك الخرطوم اللى راجع من الموتور للريداتير هيفكه من الريداتير .. ويسيبه ينزل ميه فى الارض وبعدين يجيب خرطوم ميه من الورشه ويفتح الريداتير ويحط خرطوم الميه فى الريداتير ويزود بنزين جامد ... (الهدف ان الميه اللى داخله الموتور تنزل فى الارض فيعمل غسيل للموتور من جوه .. وبعد كده يركب الخرطوم تانى ويفك الخرطوم اللى رايح من الريداتير للموتور ويعمل نفس الحكايه بحيث الميه تاخد الصدا من الريداتير وتنزل .. فاهم ازاى ؟؟

طبغا وانت واقف جنبه هتشوف اندفاع الميه لو مفيش اندفاع جامد مع تزويد البنزين يبقى الطرمبه وحشة ... (بس ماعتقدش ان الطرمبة فيها حاجة بس اعمل غسيل للدورة علشان لو فيه انسداد يروح واهو مصلحة للموتور ومش هيخسر وتديله 20 جنيه على الحكايه دى مش اكتر)
وبعدين خليه يحاول يلحم الريداتير لو قلك مش هينفع وهيبوظ كمان يومين قول له ملكش فيه وخليه يلحمه ...
الهدف من كده ان انت لما الريداتير يتلحم وتسرب الميه يروح تشوف العربية هتمشى كويس ولا لسه (بس بعد ما تعمل الغسيل وتتاكد ان الطرمبه كويسة) وتتاكد ان مفيش تسرب لو الحرارة راحت يبقى العيب من الريداتير وتحاول تغيره لو اللحام منفعش ... لو الحرارة عالية يبقى غالبا هيكون الجوان ....

جرب الاول الكلام ده قبل ما تخش فى حوارات مع الميكانيكى ...

ويا رب تكون بسيطة .....