[Injection]

الباش مهندسين قالوا كل حاجة, لأزم تتغير بحاجة قطرها أوسع, كده أنت بتحط حمل جامد على الموتور, زى ماتيجى تتنفس وتخرج الهواء وأنت مغطى فمك بأيدك, وده هيبطأ سحب العربية جدا خاصة والموتور على عدد لفات عالى.

وطبعا ماسورة عادم مخصصة لموتور 1600 غير واحدة مصممة لموتور 1000, يعنى هابلولى كده من غير تفكير فيه 600 سى سى حجم فى السلندر زيادة لو أفترضنا هابلولى برضه من غير الدخول فى فيزياء الغازات والضغط فى السلندر وكده حوالى نص لتر مكعب هواء زيادة فى نفس الشكمان, وده هيزود الحمل على الموتور لأنه هيبقى أصعب أنه يطرد غازات العادم, وهيقلل من سحبه للهواء نظرا لعدم خروج غازات العادم كلها من السلندر وللضغط فى الشكمان الذى يمنع خروج الغازات بحرية, وغازات العادم اللى معرفتش تخرج وفضلت فى السلندر مش هتخلى البنزين يحترق بكفاءة وعلى ما أعتقد هتشم ريحة بنزين فى الشكمان.

وصعب يكون للموضوع أثر كبير على الموتور فى الوقت الحالى, وبصراحة أنا معتقدش أن ليه أثر على الموتور غير "تكميمه" بس, لأن السيناريو المقترح أعلاه هيبقى عامل زى سد الشكمان بالظبط, الموتور هيبطل, أو كأنك واخد خبطة فى شكمان عربيتك, تدفق العادم هيبقى فيه قدامه عائق وهيقلل السحب جامد.

بس بصراحة لأزم تغير, مش معقول هتجيب موتور 1600 وتخنقه وتقلل من قوته بشكمان زى ده.

وحل التخريم ده بصراحة أفتكاسة جامدة قوى, ده لوحده هيخلى ريحة العربية من بره ومن جوه دمار شامل لأن شكمان العربية مش فى ضهرها من فراغ, ولو حفرت قبل علبة البيئة يبقى هتشم روايح أنما أيه, وهتلوث البيئة كمان, عايز تلوث البيئة؟؟؟, ده غير أنه هيهبب عند مكان الحفر سواء فى حوض الموتور أو تحت العربية, بس هيقلل الضغط جوه الشكمان فعلا ولو بصورة بسيطة وده طبعا غير الصوت الفظيع اللى هيطلع من الفتحات أجارك الله.