[Injection]

المشاركة الأصلية كتبت بواسطة SuccessCre8or بصراحة شايف شوية مبالغة مثلاً... انا بغير فلتر الهوا كل 30 الف فلتر البنزين كل 10 الاف بستخدم زيت معدني بغيره بعد 4000 و فلتر الزيت بغيره مرة و مرة لأ التيل ..... دي بقى اللي مش مقتنع بيها خالص ... ازاي كل 3 شهور ...؟؟ انا ماشي بالعربية 46 ألف من الزيرو و لسة بتيل الفابريكة و كنت بكشف عليه الصنايعي قاللي لسة فيه عالأقل كمان 10 الاف لو بنفس المشي بتاعك !! ازاي بقى اغيره كل 3 شهور ... بعدين لو على اصوت الصفارة ... اكشف على التيل و نضفه و كله بيبقى تمام على فكرة عربيتي فيرنا

هو مش موضوع مبالغة, فلتر الهواء كقطعة غيار معمول من مادة ورقية تعتبر هى هى اللى فى مناديل الكلينكس المعاد تصنيعها وتمنه مايستهلش 10 جنيه, وبيتوسخ بسرعة كبيرة جدا نظرا لأن العربية بتسحب هوا من تحت حوض الموتور, يعنى من تراب الشارع, ولأن مسامه ضيقة جدا والتراب بيعلق فيها وبيمنع دخول الهواء بحرية للموتور, وتنضيفه وتغييره يعتبر من الصيانات الدورية, وطبعا فيه ناس بتكبر دماغها.

وفلتر البنزين من المفترض أنه يتغير كل سنة أو مع كل تغيير للزيت أيهما أقرب, وممكن الأستغناء عن تغييره فى حالة العربيات الجديدة, أما العربيات القديمة اللى بقالها أكثر من 5 سنين, فالتانك بتاعها بيبقى مليان شوائب وصدأ وتراكمات, وعلشان كده يفضل تغيير الفلتر بصورة دورية علشان مايتسدش ويقلل من الأداء أو علشان متعديش منه شوائب تضر بعمل نظام الحقن أو تسد مسار الوقود بصورة جزئية أو كلية.

تغيير فلتر الزيت مع كل تغييرة زيت ده بقى من ال textbook بمعنى أنه مش كلامى أو مش أنا اللى بفتى

تيل الفرامل بصراحة دى حاجة نسبية بس أنا شايف الأتى:-

اللى بيسوق كتير وفى طرق داخلية وسط الزحمة بيستعمل الفرامل بكثرة, وده بيخلص على التيل بسرعة جدا لأن حضرتك أكيد عارف أن نص السواقة فى المدن على الأقل فرامل وعكس كده بالنسبة للناس متخصصة الطرق السريعة اللى مبتستعلش الفرامل الا كل فين وفين.

تيل الفرامل لما بيقل دواسة الفرامل بتنزل لتحت, وبتحتاج مدة أطول بعد الضغط عليها علشان تفرمل, بمعنى أن الدواسة أرتفاعها ثابت, لكن فيه فجوة ما بين الضغط المبدئى على الدواسة والوصول للنقطة اللى الفرامل بتبتدى تشتغل عندها, وده طبعا مؤثر جدا فى الحالات الطارئة واللى بتحتاج فرملة سريعة وقوية, وبتفرق فى أن التيل الجديد بيفرمل من لمسة للدواسة, أما المستهلك بيفرمل "بالضغط" على الدواسة حتى فى الفرملة الخفيفة.

نوع التيل مؤثر جدا فى عمره, وماينفعش أقارن بين تيل فرامل ب 30 جنيه أخره بالميت 5 شهور وتيل ebc اللى ممكن يقعد فى العربية أكثر من طنابير الفرامل نفسها, وهو فعلا فى الأول والأخر أحساس سواق وطريقة سواقة, بس فيه للأسف ناس مبتحسش, والدليل على كده التصفير اللى بيبقى مالى الشارع.

وفى الأخر برضه الموضوع عنوانه "أستخراج أفضل أداء" أنما لو على المدة فالزيت لوحده ممكن يقعد كتيييييير على مايتغير, وفلتر الهواء والبنزين ممكن يتسابوا سنين فى العربية, بس الموتور هيتخنق جداااااااا, وهيبوظ من الشوائب اللى فى الزيت وبتحك فى السلندر مع كل دورة ليه.

وربنا يبارك لحضرتك فى العربية ويبعد عنك ولاد الحرام من الصنايعية والميكانيكية


وشكرا لكل الأعضاء اللى كلفوا نفسهم وسابوا كلمة شكر أو تعليق رقيق.