[المناور]

أنا عملت القصة دى مرتين فى حياتى مرة وأنا باتعلم السواقة مع واحد صاحبى على عربيته اللادا فى شارع رايح جاى وفيه مطلع ، المهم لقيت عربية bmw فى وشى فوقفت على المطلع لغاية اما يعدى بعد ما عدى لسه باقول يا هادى وبارفع رجلى من على الفرامل وطاخ فى عربية النترا الشكل القديم كانت ورايا الحمد لله الراجل كان قريب من العربية فمحصلش أى حاجة وهو نفسه كان ذوق فمشينا علطول .

المرة التانية بعدها بسنة فى اليوم اللى اشتريت فيه عربيتى ودى أول عربية ليا ولسه راجع من سوق السيارات مخلص ورقها وكل حاجة ومعايا واحد صاحبى بيوصلهالى لغاية البيت ، المهم لقيت سكة فاضية وواسعه فقلتله ماتخلينى اسوق شوية راح مديهانى مشيت بيها كويس وكله تمام جيت عند مطب من النوع اللى مالوش وش من قفا ولسه باطلع أوله راحت العربية مبطلة منى طبعا أنا اتلخمت ومادوستش على الفرامل فلقيت العربية راحت راجعة ومريحة على تاكسى والحمد لله برضو الراجل كان قريب من العربية فمحصلش حاجة بس قعد يجعجع شوية والموضوع خلص بعد ما جيبت الوان ونزلت لصاحبى علشان يسوقها هو .