طريقة عمل البيتزا العجينة + طريقة تجهيزها بناءا علي طلب محمد صاحب محلات الفول الشهيره بالمنتدي

المقادير ديه 2 صنيه وفي واحد مفتري اعرفه ممكن يعمل 20 صنية هههههههههههه


ام هند قصدي المهم

1- كيلو الا ربع دقيق

2- بيضه

3- ربع كوب سمن مش شرط نوعها بلدي او نباتي بس تكون سايحه

4- بنص جنيه خميره بيره من اي فرن بتاعت عيش فينو تقوله او تقوليله هاتلي بنص جنيه خميرة

5- 1/8 زيتون اسود مخلي او 1/4 زيتون اسباني لانك لما تخليه من البذر هيصفي علي 1/8 كيلو

6- 1/8 جبنه رومي مبشوره انا بفضلها عن الموتزريلا علشان بتدي طعم وبتشد بردك زي الموتزريلا

7- 1/2 كيلو طماطم

8- 3 فصوص توم

ملحوظه يمكن اضافة التونه او الجمبري المسلوق اوالسجق الاسكندراني او المشروم او الفراخ او اللحم المفروم حسب الرغبه طبعا



نبتدي بقا نشغل فيلم مهمة مستحيلة لحبيب قلبي توم كروز صاحب الشيفورليه كروز


اولا يا شطار هنجيب البيضه ونكسرها في طبق غويط ونضربه بالملعقه لحد ما تبقي كلها زي الاوملت وبعدين نضيف عليه الربع كوب سمن سايحه ونضربهم مع بعض وبعدين نضيف نصف كمية الدقيق علي الكلام ده ونقلبه ونحط عليهم ذرة ملح وذرة سكر يعني شوية علي طرف ملعقه صغيرة علشان محدش يسئلني يعني ايه ذره


بعد كدا هنكون جايبين كوباية ميه دافيه ونحط فيها كمية الخميرة البيره ونضيف عليها ايضا ذرة سكر وذرة ملح ونقلبها لحد ما الخميرة تدوب بالكامل في الكوباية والكوبايه بتاعتنا تكون كوباية متوسطة من بتاعت الشاي مش نجيب كوباية عصير قصب من الحجم العائلي


بعد كدا هنضيف الخميرة بعد ما دابت علي الدقيق والسمن والبيضه ونقلبهم مع بعض

وهنبتدي نضيف بقية كمية الدقيق الفاضله عندنا واحده واحده لحد ما العجينه تبقا متماسكه وتشد معاكي او معاك ومتلزقش في الايد اول ما العجينه تلاقيها مبقتش بتلزق في الايد يبقي كدا العجينة زي الفل

هنغطي الطبق ونشيله في مكان مكتوم مفيهوش هوا علشان العجينه تخمر


في الفتر اللي العجينه بتخمر فيه هنكون احنا بنبتدي نعمل الصلصه بتاعت البيتزا


هنجيب ال 3 فصوص توم نقطعهم قطع صغيرة او ندقهم مش هتفرق وبعدين نحمرهم في نصف ملعقة سمن مع نصف ملعقة زيت

ونكون محضرين الطماطم المضروبه في الخلاط واول ما التوم ياخد اللون الذهبي نرمي فيها الطماطم


ونسيبها قيمة تلت ساعه علي النار لحد ما تتسبك وتبقي الصلصه ناشفه مفيهاش ميه



بعد ما الصلصه تتسبك هتكون العجينه بتاعتنا خمرت وبقيت زي الفل



هنجيب العجينه ونفردها بالنشابه علي قد الصنيه وتكون الصنيه مدهونه سمن خفيف علشان العجينه متلزقش في الصنيه


وبعد ما نحط العجينه في الصنيه نرش وشها بالصلصه وبعدين الزيتون واخيرا الجبنه الرومي ونكون مولعين الفرن قبليها ب 10 دقائق علشان تدخل علي نار عاليه علطول


لو الفرن عندك فيه شوايه هتحطها تحت الاول 10 دقائق بالظبط وعلي الشوية من فوق 7 دقائق


لو مفيش شوايه في الفرن يبقي هنحطها في الدور التاني من الفرن لمدة 20 دقيقة