[prettykitty]

اخى الفاضل ماكساتا اولا مبروك على العربية وربنا يبارك لك فيها,اول حاجة هتعملها وانت بتستلم عربيتك هتفحصها كويس من برة وشوف لو حتة فيها مجروحة أو لونها مخالف للون العربية علشان معظم العربيات بتتجرح أثناء النقل من مكان لمكان والتوكيل بيبيعها على أساس انها زيرو وسليمة بعد التصليح وفيه اخ فاضل من المنتدى اشترى من المصرية للسيارات فرع المنصورة عربية M11 واكتشف عن طريق الصدفة ان اكصدامها مرشوش والزجاج الامامى والخلفى متغير وعامل معاهم مشكلة وربنا ينصفه هو وكل مظلوم وينتقم من عديمى الضمير الغشاشين وأنا شفت بعينى سواقين شغالين فى المصرية للسيارات فرع طنطا سايقين عربيات بأقصى سرعة وبيخدوا بيها غرز فى وسط الزحام وطبعا ممكن اى واحد فيهم يخبطها وبعدين يردوها ويرشوها ويلبسوها للزبون المسكين,,حسبنا الله ونعم الوكيل وربنا يكفينا شر الغش والغشاشين ويسترها معانا
وشوف الكماليات اللى أنت طالبها موجودة ولا لأ, جرب التكييف وشوفه شغال كويس ولا لأ وجرب الكاسيت وكل الكماليات الموجودة وافتح الشنطة واقفلها وجرب الابواب واتاكد انها مش مفارقة وشوف كل حاجة شغالة صح ولا لأ وشوف عداد الكيلومتر ماشى كتير ولا لأ.
وأفتح الشنطة شوف الكوريك والأستبن موجودين ولا لأ وإوعى تنسى تاخد المانيوال بتاع العربية والكاسيت وأنت بتستلم وربنا يحفظك فى طريقك ورجاء عدم التسرع فى القيادة لان دى والله مش شطارة بالعكس دى خيبة قوية وانا بزعل اوى من اللى بشوفه فى الشوراع من الناس اللى بتستهتر بارواحها و ارواح غيرها وربنا يسلمنا جميعا فى طريقنا وشكرا