اولا
احب اشكر الاستاذ احمد علي الموضوع الجميل و المهم و فتح باب جميل الكل محتاجه حاليا
ثانيا
انا احمد محمد ابوالاسعاد
ثالثا
انا من مدينه طنطا من ميدان الساعه وده مسقط راسي
وعيله ابوالاسعاد هي من بلد محله روح و ليا الفخر اني بنتسب للبلد دي و للعيله دي
وانا بعتز جدا باسم ابوالاسعاد
جدي ابوالاسعاد هوا جدي ال 17
وينتسب مواليده للقرن 18
ويقال هوا من اول المطلقين اسم محله روح علي البلد ومن منشئيها والله اعلم
رابعا
انا مهنتي مهندس مدني ديزينر و بعتز جدا بالمهنه دي
بحس متعتها ان امشي بالشارع و اشوف مجهودي و الناس بتستخدمه و لسنين طويله
امشي في اي شارع اقول انا ساهمت ولو بطوبه في المبني ده
خامسا
كنت بشتغل في المقاولون العرب وباذن الله هرجعلها تاني بس اما اقف علي رجلي اكتر من كده لان بحاول اشتغل خاص ليا انا
سادسا
سكني
بالفعل انا ساكن في اكتر من بلد
في المنصوره و طنطا و احيانا القاهره و الاسكندريه
بحكم الظروف و الشغل و الاحتياجات
سابعا
هواياتي
انا من عشاق جدا علم النفس واشتركت بدورات العالم الكبير ابراهيم الفقي و لله الحمد حاصل علي شهادات خبره لعلم النفس
ومن عشاق السيارات و سباقاتها وبيقولو عليا مجنون عربيات
وبهوا جدا الرسم و عملت لوحات كتير منها الي فاز بجوايز و منها الي اشتركت بيه في معارض
وبعشق جدا تصوير الطبيعه وجمالها واكره ما عندي تصوير البشر اذا قورن بالطبيعه
وبيتقال عليا حلال عقد الالكترونيات
ثامنا
مشهور باسم احمد حوادث
الحمد لله كل سنه بطلع منها من 3-5 حوادث ولله الحمد وكل حادثه ابشع من الي قبلها
اخر حادثه وقعت من قطر اكس رايح اسكندريه تقريبا القطر كان ماشي علي 120 كيلومتر ولله الحمد انتهي الحوار بعمليه رباط صليبي و غضروف والحمد لله اتحسنت
تاسعا
كنت مرتبط بس ربنا مارتش وحاليا ارتبطت تاني بانسانه من اروع ما تكون ربنا يباركلي فيها يارب
عاشرا
ليا الفخر ان اتعرفت عليكو و علي الموقع المميز ده
تقبلو احترامي الشديد ليكو و موضوعاتكم المميزة