رد: ارجو الافادة
أنا مش خبير فى السيراتو بس هتكلم على العربيات عامة.
الزيت بيفقد لزوجته بعد فترة, وبالتالى أحتكاك أجزاء الموتور ببعضها بيزيد والموتور بيسخن, وده بيأثر على الموتور جامد وكمان الزيت بينقص من البخر والمفروض يتكشف عليه كل فترة.
فلتر الزيت بتتجمع فيه شوائب تسده وده بيخلى الزيت فيه شوائب وبيخلى مروره من الفلتر صعب مما بيؤدى الى تجريح الشوائب لجدران السلندر وعدم قيام الزيت بوظيفته وهى منع الأحتكاك.
فلتر البنزين الشوائب بتتجمع فيه وتسده وده بياثر على سحب العربية ونقاء البنزين الداخل لها.
وفلتر الهواء برضه الشوائب بتسده وده بيصعب دخول الهواء للموتور مما يؤدى الى تقليل السحب والسرعة.
سير الكاتينة بيتغير كل 40000 أو 60000 كيلو علشان لو أتقطع وأنت ماشى العربية هتجيب صبابات.
ديسك وأسطوانة كل 60000 كيلو مع الكشف على زيت الفتيس كل فترة.
تغيير تيل الفرامل كل 3 شهور والكشف على مستوى مياه التبريد وتزويدها فى حالة النقص بمياه من نفس النوع.
وفيه حاجات تانية كتير بتتغير بصفة دورية علشان تحافظ على العربية, ولو الرقم اللى حضرتك كاتبه صح ومعملتش أى حاجة من الحاجات دى أنا متفاجئ أن العربية لسه ماشية, وحضرتك لازم تروح مركز خدمة ضرورى تخليه يعمل صيانة دورية كاملة للعربية.
أنا بالنسبة للتكييف, من الصيانات الدورية أنك تكشف على مستوى غاز الفريون وتزوده لو ناقص, وتنضف فلتر التكييف أو تغيره بواحد جديد, ولو كفاءته ما أتحسنتش كده ندخل فى سكة الأعطال.
فايدة الصيانة أنك بتحافظ على الموتور والعربية وبتبقى متأكد من أنها سليمة, يعنى بعد فترة من تجاهل العربية هتلاقيها "فتحت بقها" يعنى سير كاتينة يتقطع, طنابير فرامل تبوظ من عدم تغيير التيل, كفاءة موتور قليلة نتيجة للى بيحصل فيه, ضعف عام فى السحب والسرعة, ده غير أنها لاقدر الله ممكن تعمل حاجة مش تمام معاك وأنت ماشى .
يعنى الصيانات الدورية بتطمنك على العربية وأنك تصرف 100 جنيه مثلا عليها كل 3 شهور أحسن ماتصرف أيام جنب سعادة الميكانيكى وتدفع 500 جنيه فى زيارات متكررة ليه.
|