[حازم شاهين]

الحمد لله ربنا كتب لنا نتجمع تانى على خير فى رمضان السنة دى يوم الجمعة الماضى 10 رمضان الموافق 20 أغسطس 2010
بدأت المقابلة السنة دى بترتيبات و إتصالات على أعلى مستوى طول اليومين إللى قبل المقابلة من خلال أبو نورا من ناحية و حازم خضر من ناحسة تانية و تنسيقهم المستمر مع باقى اﻷعضاء .

يوم المقابلة أنا شخصيا طلعت من بورسعيد الساعة 3 بعد الظهر و الحمد لله الطريق كان رايق و هادى و الحمد لله وصلت الربوة الساعة خمسة و تلت تقريبا لقيت مجموعة من الزملا وصلوا بالفعل و كانوا واقفين فى الباركينج على رأسهم حازم خضر لكن الظاهر قبل م أوصل كان فيه مشكلة فى الربوة و كانت أماكن الجلوس مش جاهزة.

إنقسم الموجودين على نوعية الفطار لمجموعتين لكن إتأخرنا شوية على ما الناس راحت تجيب الفطار و كان نتيجة الموضوع ده إن الفطار وصل بعد المغرب بنص ساعة تقريبا لكن الحمد لله اتصبرنا ﻹن الخير كان كتير من اﻷعضاء إلى كانوا جايبين أكلهم معاهم ، و فى اﻷخر مقدرناش نخلص على الكنافة و القطايف و النمل إسترزق كمان.

بعد كده إتصورنا الصور الجماعية إللى شوفتوها و إنقسمنا إلى فريقين فريق طيب و هادى قاعد فى حاله و فريق من هواة الفن التشكيلى التكعيبى السريالى إللى لاقو فى عربية كورسير ذات البياض الناصع أكبر فرصة فى إخراج كل غل السنين من العيال إللى ماشية تنقرش العربيات فى الشوارع .



موضوع تاكسى السهرة و إللى جراله

إستمرت المقابلة الجميلة و إنقسم اﻷعضاء لمجموعات لكن الوقت كان مر بسرعة جدا و للأسف ملحقتش أقعد مع كل الناس إمتدت السهرة لغاية الساعة 12 باليل تقريبا و أعتقد كان ليها كمالة فى مدينة نصر على أنغام الشيشة الخالدة.

كل سنة و إنتم طيبين جميعا و يا رب نتقابل على خير دايما و فى إنتظاركم جميعا فى مقابلات جاية كتير بإذن الله و أقرهم مقابلة فى إسكندرية الخميس و الجمعة إللى ابعد لعيد مباشرة إن شاء الله

قبل ما اسيبكم مع الصور أحب أقولكم على حضروا مع حفظ اﻷلقاب طبعا
محمد بندارى - نبيل عبد الرحمن - سيف الدين - بوب الجامد(اسلام عبد المنعم) - تيفا كينج (مصطفى ربيع)- بدر بسيونى - جاديكس (محمد جاد)- إيجبت فوتو(محمد عادل) - هشام أبو العنين - معتز محمد - كريم على - محمد زكى - كورسير(أحمد ممدوح) - MO (محمدهشام) - كوكى (محمود أحمد)- ﻻنسر ستايل(محمد أسامة) - أحمد بدر - ATGPS (أيمن مصطفى) - سبوهاشم (شريف شاكر) - محمد إبيزا - طارق صقر - أحمد أنور - سومو (أحمد البدوى) - طارق البدرى - أكرم فادى - عبد الرحمن جبر - نور بيجو - فادى - حازم خضر - أبو نورا - حازم شاهين



من اليمين للشمال
الصف اﻷمامى : حازم خضر - كوكى - لانسر - محمد زكى - طارق البدرى - معتز
الصف اﻷوسط : سيف الدين - كورسير - نبيل عبد الرحمن - أبو نورا - بندارى - حازم شاهين
الصف الخلفى : شريف شاكر - جاديكس - تيفا كينج - عبد الرحمن - أكرم - هشام - بدر بسيونى



إيجبت فوتو مع لانسر ستايل



فى المقدمة أحمد بدر مع حازم خضر
فى الخلفية شريف شاكر و سيف الدين و هشام و حته من كورسير



العبد لله - طارق صقر - بدر بسيونى



كورسير بيهندس

لمزيد من صور المقابلة

و كل سنة و إنتم طيبين